रुसद्वारा युक्रेनमा ५९८ ड्रोन र ३१ क्षेप्यास्त्र प्रहार, ४ बालबालिकासहित २१ जनाको मृत्यु

काठमाडौँ । रुसले युक्रेनमा ५९८ ड्रोन र ३१ क्षेप्यास्त्र प्रहार गरेको छ । यस आक्रमणमा ४ बालबालिकासहित २१ जनाको मृत्यु भएको मिडिया रिपोर्टमा उल्लेख छ । यसबाहेक आक्रमणमा ४५ जना घाइते भएका छन् । अमेरिकी राष्ट्रपति ट्रम्प र रुसी राष्ट्रपति भ्लादिमिर पुटिनको अलास्कामा भएको भेटघाटको १३ दिनपछि यो भिषण आक्रमण भएको हो ।

आक्रमण बारे युक्रेनी राष्ट्रपति भोलोदिमिर जेलेन्स्कीले रुसले शान्तिको सट्टा क्षेप्यास्त्र रोजिरहेको बताएका छन् । 

रुसी आक्रमणमा ब्रिटिश काउन्सिलको कार्यालय क्षतिग्रस्त भएको छ । बेलायती सरकारी सम्पत्ति रुसी आक्रमणमा परेको यो पहिलो पटक हो । त्यस्तै आक्रमणमा युरोपेली संघका मिसन भवनहरूमा क्षति पुगेको छ । यो आक्रमणपछि बेलायत र युरोपेली संघले रुसलाई चेतावनी दिएका छन्, ह्वाइटहाउसले वार्ता जारी रहने बताएको छ । आक्रमणमा किभ कार्यालयहरू क्षतिग्रस्त भएपछि बेलायत र युरोपेली संघले रुसी राजदूतहरूलाई बोलाएको छ ।