उसु खेलाडी विजयले जीते थाउलो विश्वकपमा कास्यपदक

काठमाडौं । नेपालका उसु खेलाडी विजय सिन्जालीले तेस्रो थाउलो विश्वकपमा कास्यपदक जितेका छन् । जापानमा जारी प्रतियोगिताको चेनसु इभेन्ट्‌समा विजयले ९.६३६ अंकसहित नेपाललाई कास्यपदक दिलाएको नेपाल उसु महासंघले जानकारी दिएको छ ।

विजयले सो जितले एसियन गेम्समा मद्दत पुग्ने र नेपाललाई विश्वमा चिनाउनु पाएकोमा खुसी व्यक्त गरेका छन् । जापानमा भइरहेको थाउलो विश्वकप अन्तर्गत आइतबार बिहान भएको छेन्सुतर्फको विधामा विजयले ९.६३६ अंक स्कोर गर्दै तेस्रो स्थान हासिल गरेका हुन् ।

मलेसियाका वेङ सन वोङले ९.७७३ अंक जोड्दै स्वर्ण पदक जिते भने तथा घरेलु खेलाडी मोटोयोशी अराकीले ९.७६६ अंकसहित रजत जिते । विजयको इभेन्टमा कूल ९ खेलाडीले प्रतिस्पर्धा गरेका थिए । उनले अमेरिका, मेक्सिको लगायत देशका ६ खेलाडीलाई पछि पारेका हुन् । यो नेपालको लागि थाउलो उसुमा ऐतिहासिक पदक हो ।