रुससँगको युद्ध समाप्त भएमा राष्ट्रपति छोड्न तयार छु- जेलेन्स्की

काठमाडौँ । युक्रेनी राष्ट्रपति भोलोडिमिर जेलेन्स्कीले रुससँगको युद्ध समाप्त भएपछि राष्ट्रपति पद त्याग्न तयार रहेको बताएका छन् । न्यूयोर्कमा अन्तर्वार्तामा जेलेन्स्कीले उनको लक्ष्य युद्ध रोक्नु रहेको बताउदै सत्तामा रहन नचाहेको स्पष्ट गरेका हुन् ।

जेलेन्स्कीले युद्धविराम भयो भने, उनी संसदलाई चुनाव गर्न आग्रह गर्ने बताएका छन् । उनले भने- 'युद्ध पछि, मानिसहरू नयाँ नेता चयन गर्न चाहन्छन् । म त्यसको लागि तयार छु ।'

युक्रेनमा मार्शल ल लागू भएका कारण संबिधान अनुसार चुनाव हुनबाट रोकिएको छ । जेलेन्स्की २०१९ मा भारी विजयका साथ राष्ट्रपति बनेका थिए । उनको कार्यकाल मे २०२४ मा समाप्त हुनुपर्ने थियो, तर युद्धका कारण यो लम्बिएको छ । युद्ध सुरु हुँदा उनको लोकप्रियता ९० सम्म पुगेको थियो र अहिले पनि, विभिन्न सर्वेक्षणहरूले उनलाई ६० प्रतिशत भन्दा बढी युक्रेनीको समर्थन भएको देखाएका छन् ।

जेलेन्स्कीसँग अगस्टमा ह्वाइट हाउसमा अमेरिकी राष्ट्रपति डोनाल्ड ट्रम्पले युक्रेनमा चुनाव नभएको बारेमा गुनासो गरेका थिए । जेलेन्स्कीले उनलाई युद्धविराम भयो भने, उनी संसदलाई चुनावको लागि तयारी गर्न आग्रह गर्ने जवाफ दिएका थिए ।