'मङ्कीपक्स' काे उपचारमा 'स्मलपक्स' काे खाेप लगाउन अनुमति

युरोपेली युनियनले मङ्कीपक्सको उपचारमा स्मलपक्सको खोप लगाउन अनुमति दिएको छ । मङ्कीपक्स र स्मलपक्सको भाइरसका बीचमा धेरै समानता देखिएकाले स्मलपक्सको खोप लगाउन अनुमति दिएको भारतीय एनडीटीभीले जनाएको छ । 

डेनमार्कको औषधि उत्पादक कम्पनी बावरियन नर्डिकले आफूले स्मलपक्सका लागि उत्पादन गरेको खोपलाई युरोपेली युनियनले मङ्कीपक्सको उपचारमा प्रयोग गर्ने अनुमति दिएको जनाएको छ । युरोपेली आयोगका औषधि विज्ञहरूले अनुसन्धान गरेपछि यो निर्णय भएको खबरमा उल्लेख छ । यो खोप युरोपेली युनियनका सदस्य देश, आइसन्ल्याड र नर्वेमा मात्रै प्रयोगको अनुमति दिइएको छ । 

विश्व स्वास्थ्य सङ्गठनले मङ्कीपक्सलाई लिएर विश्वव्यापी आपत्काल घोषणा गरिसकेको छ । ७२ देशका १६ हजार जनामा यो सङ्क्रमण फैलिइसकेको छ । स्मलपक्सले सन् १९७० को दशकमा युरोपमा ठूलो क्षति गरेको थियो । सन् १९८० मा भने यो सङ्क्रमणको अन्त्य भएको थियो ।