धनुषामा बालिकाको हत्या, बलात्कारपछि हत्याको आशंका

महेन्द्रनगर (धनुषा), २९ मङ्सिर : धनुषामा एक बालिकाको हत्या भएको छ । सबैला नगरपालिका–९ कुसमहा सतोखरकी ६ वर्षीया बालिका राखी यादवको हत्या भएको हो ।

 बालिकाको शव नग्न अवस्थामा सतोखर पोखरी नजिक खाल्डोमा जमेको पानीमा गए राति फेला परेको धनुषाका प्रहरी प्रवक्ता प्रहरी नायव निरीक्षक रञ्जन अवालेले जानकारी दिनुभयो । बालिकाले लगाएका लुगा पोखरी छेउमा फेला परेको उहाँले बताउनुभयो । 

शवको प्रकृति हेर्दा बलात्कार गरी उनको हत्या भएको देखिएको एक प्रहरीले बताए। ‘तलको भागको कपडा छैन। शरीरमा रगतजस्तो देखिएको छ। संवेदनशील अंगमा चोट देखिएको छ। बलात्कारकै आशंका छ, यसबारे विस्तृत अनुसन्धानपछि खुल्ला,’ उनले भने। 

शव परीक्षणका लागि प्रादेशिक अस्पताल जनकपुर लगिएको छ । घटनामामा संलग्न भएको आशङ्कामा दुई जनालाई पक्राउ गरिएको प्रवक्ता अवालेले बताउनुभयो ।