च्याम्पियन्स लिग- सिटीको शानदार जित

 यूईएफए च्याम्पियन्स लिग फुटबलमा अर्लिङ हालान्डको दुई गोलको मद्दतले म्यानचेस्टर सिटीले कोपनहेगनमाथि गोलवर्षा गरेको छ । समूह चरण अन्तर्गत बुधबार राति सिटीको जितमा स्टार स्ट्राइकर  हालाण्डले २ दुई गोल गरे । बुधबार राति च्याम्पियन्स लिगको समूह जी अन्तरगतको खेलमा सिटी ५–० गोलले विजयी भएको हो ।

खेलको सातौँ मिनेटमा नै हालान्डले गोल गर्दै सिटीलाई अग्रता दिलाए । ३२ औँ मिनेटमा उनले टोलीको अग्रता दोब्बर बनाए । हालान्डले प्रतियोगिताको २२ खेलमा २८ गोल गरेका छन् ।

योसँगै पहिलो ३० खेलमा सबैभन्दा धेरै गोल गर्ने रुड भान निस्टरलोयको कीर्तिमानलाई उनले भङ्ग गरेका छन् । यो सिजन उनले पेप ग्वार्डिओलाको टोलीका लागि १२ खेलमा १९ गोल गरिसकेका छन् ।

रियाद महरेज र जुलियन अल्भारेजले एक एक गोल गर्दा सिटीले एक गोल आत्मघाती उपहार पाएको थियो । कोपनहेगनलाई ५–० ले पराजित गर्दा सिटीले लगातार विजयी यात्रा कायम राख्दै नकआउट सम्भावना बलियो बनाएको छ।