बक्यौता उठाउने मेरो प्रयास नै पदबाट हट्नुपर्ने मुख्य कारण

काठमाडौं । नेपाल विद्युत् प्राधिकरणका पूर्वकार्यकारी निर्देशक कुलमान घिसिङले लोडसेडिङ अन्त्यका लागि इमान्दार प्रयास गर्नुका साथै नाफामा लैजान विद्युत् महसुल बक्यौता उठाएकै कारण आफूलाई सरकारले पदबाट हटाएको बताएका छन्। शुक्रबार पत्रकार सम्मेलन गर्दै घिसिङले उक्त कुरा बताएका हुन्।

‘मैले अदालतको आदेशअनुसार विद्युत् महसुल बक्यौता उठाएको थिए। तर, सरकारले बक्यौता उठाएकै कारण मलाई हटायो। बक्यौता उठाउने मेरो प्रयास नै पदबाट हट्नुपर्ने मुख्य कारण बनेको हो,’ उनले भने।

घिसिङले सार्वजनिक संस्थाको बक्यौता उठाउन खोज्ने मेरो प्रयास राज्यविरुद्धको अपराध हो? भन्दै प्रश्न गरका छन्। यसको जवाफ इतिहास र नेपाली जनताले माग्ने उनको विश्वास छ।

घिसिङले लोडसेडिङ अन्त्य कुनै चमत्कार नभएर आफ्नो इमानदार प्रयास भएको बताएका छन् ।

‘वैदेशिक मुद्रामा चाप परेको बेला हामीले विद्युत् निर्यात गरेर अर्थतन्त्रमा योगदान गर्‍यौं। निरन्तर घाटामा रहेको प्राधिकरण अर्बौं नाफामा छ। हामी प्राधिकरणलाई सशक्त र आत्मनिर्भर बनाउन सफल भयौं। प्राधिकरणले जनताको घरघरमा बिजुली पुर्‍याउन सक्नु नै मेरो कार्यकालको सफलता हो,’ उनले भने।