आज दिनभरका प्रमुख २० समाचार बुलेटिन

काठमाडौँ । आज देश विदेशका प्रमुख २० समाचार यस प्रकार रहेका छन् ।

१- शाङ्घाई सहयोग संगठन (एससिओ) प्लस को शिखर सम्मेलनका क्रममा प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच भेट भएको छ । भेट बारे मोदीले भनेका छन्- तियानजिनमा नेपालका प्रधानमन्त्री केपी ओलीलाई भेट्न पाउँदा खुसी लाग्यो । नेपालसँग भारतको सम्बन्ध गहिरो र विशेष छ ।

२- प्रधानमन्त्री केपी शर्मा ओली चीनका राष्ट्रपति सी चिनफिङ र उनकी धर्मपत्नी पेङ लियुआनद्वारा शाङ्घाई सहयोग संगठन (एससिओ) प्लस को शिखर सम्मेलनमा सहभागी मुलुकका लागि आयोजित स्वागत समारोहमा सहभागी भएका छन् । आजदेखि शुरु भएको सिखर सम्मेलनमा प्रधानमन्त्री ओलीले सेप्टेम्बर १ मा सम्बोधन गर्ने तालिका रहेको छ । सन् २००१ मा स्थापना गरिएको शाङ्घाई सहयोग संगठन (एससिओ) को नेपाल सन् २०१६ देखि यस संगठनको संवाद साझेदार रहँदै आएको छ ।

३- अख्तियार दुरुपयोग अनुसन्धान आयोगले तत्कालीन जिल्ला शिक्षा कार्यालय, खोटाङका तत्कालीन जिल्ला शिक्षा अधिकारी डा. गणेश प्रसाद भट्टराई, केशव प्रसाद दाहाल र ज्ञानमणि नेपाल, प्रधानाध्यापक, बिद्यालय व्यवस्थापन समितिका अध्यक्षसमेत १३ जनाविरुद्ध भ्रष्टाचारको मुद्धा दायर गरेको छ । अख्तियारले उनीहरुविरुद्ध खोटाङको हलेसी तुवाचुङ नगरपालिका-४ स्थित लक्ष्मी माध्यमिक बिद्यालय, बडहरेको बिद्यालय भवन निर्माण गर्दा भ्रष्टाचार गरेको आरोप लगाएको छ । अख्तियारले तत्कालीन जिल्ला शिक्षा कार्यालय, खोटाङका तत्कालीन जिल्ला शिक्षा अधिकारी डा. गणेश प्रसाद भट्टराई, केशव प्रसाद दाहाल र ज्ञानमणि नेपाललाई १०-१० लाख, जिल्ला शिक्षा कार्यालय, खोटाङका तत्कालीन लेखा अधिकृत भुवन प्रसाद आचार्यलाई १० लाख, जिल्ला शिक्षा कार्यालय, खोटाङका तत्कालीन लेखापाल सुरेश कुमार श्रेष्ठ र सव-इन्जिनियर शिवराज राईलाई २४-२४ लाख, श्री लक्ष्मी माध्यमिक विद्यालय, खोक्सेली, खोटाङका तत्कालीन विद्यालय व्यवस्थापन समितिका अध्यक्ष पृथ्वी दाहाललाई ८ लाख तत्कालीन विद्यालय व्यवस्थापन समितिका अध्यक्ष शेष कुमार पौड्याललाई १३ लाख १२०, लक्ष्मी माध्यमिक विद्यालय, खोक्सेली, खोटाङका तत्कालीन प्रधानाध्यापकद्वय राजेन्द्र प्रसाद दाहाल र ऋषिराम पोखरेललाई ८-८ लाख बिगो माग गरेर मुद्धा दायर गरेको छ । त्यस्तै लक्ष्मी माध्यमिक विद्यालय, खोटाङका प्रधानाध्यापक नयन कुमार राईलाई ५ लाख १२०,  लक्ष्मी माध्यमिक विद्यालयका तत्कालीन लेखापाल सीता कार्कीलाई २१ लाख १२० र लक्ष्मी माध्यमिक विद्यालय, खोटाङको भवन निर्माण गर्ने जिम्मेवारी पाएका अर्जुन तामाङलाई १६ लाख बिगो माग गरेर मुद्धा दायर गरेको छ । 

४-  विपी राजमार्गको रातिमा बन्द हुने समय भदौ मसान्त सम्म थपिएको छ । जिल्ला सुरक्षा समिति काभ्रेपलाञ्चोकको निर्णय अनुसार सामान्य वर्षातमा पनि पहिरोबाट राजमार्ग अवरुद्ध हुने गरेको र मनसुनको प्रभाव अझै कायम रहेको हुँदा सवारीसाधन र यात्रुलाई जोखिमको प्रभावबाट कम गर्न वि.पि राजमार्गको काभ्रेभञ्ज्याङ्ग- भकुण्डेवेशी हुदैँ सिन्धुलीतर्फ जाने सार्वजनिक तथा निजी सवारी साधनलाई साँझ ५ बजेदेखि विहान ५ बजेसम्म निषेध गरिएकोमा उक्त व्यवस्था मिति भाद्र १६ गतेदेखि भाद्र मसान्तसम्म कायम राखिने भएको छ । विपी राजमार्ग साउन १ गतेदेखि रातिमा बन्द हुदै आएको छ ।

५-  नागरिक उन्मुक्ति पार्टी (नाउपा) को केन्द्रीय कार्यसमितिको बैठक आइतबारदेखि काठमाडौंमा सुरु भएको छ । रञ्जिताले बैठकमा एका तिर आफ्नो र अर्को तिर संरक्षक रेशम चौधरीको तस्बीर भएको ब्यानर राखेर बैठक शुरु गरेकी छन् । यस बैठकमा संरक्षक रेशम चौधरी पक्ष भने सहभागी भएका छैनन् । दुईदिनसम्म चल्ने बैठकमा पार्टीको विधान संशोधन, केन्द्रीय सदस्य मनोनयन, निर्वाचन आयोगमा अद्यावधिक लगायत उपनिर्वाचनका विषयमा छलफल हुने बताइएको छ । बैठकमा केन्द्रीय सदस्यका साथै संघ, प्रदेश र स्थानीय तहमा पार्टीका निर्वाचित प्रतिनिधिहरूको समेत सहभागिता रहेको छ । यसअघि पार्टीका संरक्षक रेशम चौधरी पक्षको राष्ट्रिय भेलाले अध्यक्ष श्रेष्ठलाई पार्टीको अध्यक्ष र साधारण सदस्यबाट समेत हटाएर रेशमका बुवा लालबीर चौधरीलाई अध्यक्ष बनाएपनि निर्वाचन आयोगले रञ्जिता नेतृत्वको केन्द्रीय समितिलाई नै मान्यता दिएपछि नाउपा विभाजनको संघारमा रहेको छ ।

६-दिनेश राउतले नयाँ फिल्म 'कुमारी' को घोषणा गरेका छन् । यस अघि ‘प्रसाद’, ‘पुजार सार्की’ जस्ता सामाजिक कथामा फिल्म बनाएका राउतले लभस्टोरी फिल्म ‘कुमारी’ बनाउने घोषणा गरेका हुन्  ।  यस फिल्ममा अबिसेक खड्का र आकृति राजभण्डारीको मुख्य भूमिका रहनेछ । अबिसेकले यसअघि फिल्म ‘बेहुली फ्रम मेघौली’ मा अभिनय गरेका थिए । आकृति भने चर्चित गीत ‘बार्दली’ की मोडल हुन् । फिल्म 'आइ एम सरी’बाट निर्देशकीय यात्रा सुरु गरेका निर्देशक राउत ‘नोभेम्बर रेन’ र ‘क्लासिक’ जस्ता सफल प्रेमकथामा आधारित फिल्म बनाएर स्थापित भएका थिए । 

७-  डा. गोविन्द केसीले तीनदिने सत्याग्रह सुरु गरेका छन् । आइतबार धनगढीस्थित गेटा मेडिकल कलेजमा निजी मेडिकल कलेजको सिट वृद्धि लगायतका निर्णयको विरोध गर्दै तीन दिने सत्याग्रह सुरु गरेका हुन् । उनले पत्रकार सम्मेलन गर्दै निजी मेडिकल कलेजहरूको सिट वृद्धि गर्दा नेता र माफियाको झोला भरिने आरोप लगाए । उनले भने- 'निजी मेडिकल कलेजहरूको सिट वृद्धि गर्दा नेता र माफियाको झोला भरिन्छ । शिक्षाको गुणस्तर खस्कनु भनेको स्वास्थ्य सेवामा ह्रास आउनु हो । सरकार र चिकित्सा शिक्षा आयोगका पछिल्ला निर्णयले विद्यार्थी र जनतालाई लाभ नदिई उल्टै शिक्षा–स्वास्थ्य प्रणाली नै धराप पर्दै गएको छ ।' केसीले इलाम, उदयपुर र डडेलधुरामा सरकारी मेडिकल कलेज तथा अस्पताल खोल्नुपर्ने, कैलालीको गेटामा निर्माण सम्पन्न भइसकेको शिक्षण अस्पताल र शैक्षिक कार्यक्रम तत्काल सञ्चालन गर्नुपर्ने माग राखेका छन् । साथै डा. केसीले निजी मेडिकल कलेजको सिट वृद्धि फिर्ता गर्नुपर्ने माग राखेका छन् ।

८- भारत र अमेरिकाको सम्बन्ध दिनप्रतिदिन खराब हुदै गइरहेको देखिएको छ । अमेरिकाले भारतलाई ५० प्रतिशत कर लगाएर शुरु भएको खराब सम्बन्धको शुरुवातसँगै अब राष्ट्रपति डोनाल्ड ट्रम्पले यस बर्षको अन्त्यमा हुने भारत भ्रमण स्थगित गरेका छन् । न्यूयोर्क टाइम्सले मोदीले 'सच्चा साथी' भनेका ट्रम्पको अब उनीसँग सम्बन्ध बिग्रिएको दाबि गर्दै यस वर्षको अन्त्यमा क्वाड शिखर सम्मेलनमा भाग लिन भारत आउने बताएका ट्रम्प अब नआउने भएका हुन् । कर लगाएपछि भारतमा ट्रम्पको विरुद्धमा अब नकारात्मक वातावरण सिर्जना भएको छ । गत हप्ता, महाराष्ट्रमा एक उत्सवको क्रममा, उनको एउटा विशाल पुतला घुमाइएको थियो, जसमा उनलाई 'पिठ्युँमा छुरा प्रहार गर्ने' व्यक्तिको रूपमा देखाइएको थियो । अमेरिकाले चालेका कडा कदमहरूलाई भारतमा पूर्ण रूपमा धम्की अर्थात् 'गुण्डागिरी' भनिरहेका छन् ।

९- आज नेप्सेमा गिरावट आएको छ । आज आइतबार नेप्से ३१.१७ अंकले घटेर २७४९.८३ विन्दुमा पुगेर रोकिएको छ । आज ३२१ कम्पनिका एक करोड ४८ लाख ५ हजार ५६९ कित्ता शेयर ६ अर्ब ६ करोड १८ लाख २२ हजार ३७९ मा कारोबार भएको थियो । आज सबै क्षेत्रको शेयरमा गिरावट आएको छ ।

१०- शाङ्घाई सहयोग संगठन (एससिओ) को शिखर सम्मेलनका लागि चीनमा रहेका प्रधानमन्त्री केपी शर्मा ओली र समाजवादी गणतन्त्र भियतनामका प्रधानमन्त्री फाम मिन चिङबीच चीनको तियानजिनमा दुईपक्षीय भेटवार्ता भएको छ । भेटवार्तामा दुई पक्षीय हितका विषयमा छलफल भएको प्रधानमन्त्रीको सचिवालयले जानकारी दिएको छ । 

११- अनलाइन सञ्चारमाध्यमको दर्ता र नवीकरणका सम्बन्ध बारे सञ्‍चार तथा सूचना प्रविधि मन्त्रालय, नेपाल पत्रकार महासंघ, प्रेस काउन्सिल नेपाल र नेपाल विज्ञापन बोर्डबीच चार बुँदे सहमति भएको छ । सहमतिका बुंदाहरु: १- नेपाल पत्रकार महासंघबाट प्रस्तुत भएको ज्ञापनपत्रका सम्बन्धमा मन्त्रालयका श्रीमान् सचिवज्यू सहित पत्रकार महासंघका अध्यक्ष एवम् अन्य पदाधिकारीको उपस्थितिमा छलफल गरियो ।  २- अनलाइन सञ्चार माध्यम सञ्चालन निर्देशिका, २०७३ को दफा ६ मा दर्ता भएका अनलाइनसञ्चार माध्यमले प्रत्येक आर्थिक बर्ष समाप्त भएको मितिले ६ महिना (पौष महिना भित्र) नवीकरण गराउनुपर्ने व्यवस्था भएको सन्दर्भमा अर्को व्यवस्था नभएसम्म प्रेस काउन्सिल नेपाल र नेपाल विज्ञापन वोर्डले अनलाइन सञ्चार माध्यम सूचीकरणको कार्य यथावत राख्न मन्त्रालयबाट पत्राचार गर्ने । सूचना तथा प्रसारण विभागले प्रेस प्रतिनिधि प्रमाणपत्र सो अवधि सम्म साविक बमोजिम नै जारी गर्ने । ३- केहि नेपाल ऐन संशोधनमार्फत छापाखाना र प्रकाशनसम्बन्धी ऐन, २०४८ मा भएको संशोधन बमोजिम अनलाईन सञ्चार माध्यमलाई व्यवस्थापन गर्न तयार पारिएको छापाखाना र प्रकाशनसम्बन्धी (दोश्रो संशोधन) नियमावली, २०८२ लाई १५ दिन भित्र स्वीकृत गर्न मन्त्रालयले आवश्यक पहल गर्ने । ४- नयाँ अनलाइन सञ्चार माध्यम दर्ताका लागि निवेदन प्राप्त भएमा सूचना तथा प्रसारण विभागले क्रमसंख्या उल्लेख गरी संकलन गर्ने ।

१२- नेपाली कांग्रेसको शुभेच्छुक संस्था सेन्टर फर डेमोक्रेटिक इञ्जिनियर्स (सिडेन) को अध्यक्षमा रविभूषण झा निर्वाचित भएका छन् । संस्थाको शनिबार भएको आठौं अधिवेशनले झाको नेतृत्वमा नयाँ नेतृत्व चयन गरेको हो । झाले अध्यक्षका उम्मेदवार धनेन्द्र केसीलाई पराजित गरेका हुन् । पार्टीको संस्थापन पक्षबाट अध्यक्षको उम्मेदवारबाट बनेका झाले १३१५ मत प्राप्त गरेर विजयी भए भने उनका प्रतिष्पर्धी केसीले १००२ मत पाएको निर्वाचन समितिले जानकारी दिएको छ । नवनिर्वाचित कार्यसमितिमा अधिकांश संस्थापन पक्षका रहेका छन् । जसमा उपाध्यक्षमा निर्वाचित मदन पुरी, महासचिवमा सुदर्शन शर्मा, उपमहासचिवमा खगेन्द्र अवस्थी निर्वाचित भए भने कोषाध्यक्षमा रस्मिता बञ्जारा विजयी भएकी छन् ।

१३- विद्यालय शिक्षा विधेयकमा रहेको केही प्रावधान संशोधन गर्नुपर्ने माग राख्दै राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन) का पदाधिकारीहरूले आज राष्ट्रपति रामचन्द्र पौडेललाई भेट गरी लिखित धारणा बुझाएका छन् । शीतल निवासमा भएको भेटमा नेसनल प्याब्सन पदाधिकारीहरूले छात्रवृत्ति, पूर्व–प्राथमिक तह, सामाजिक सुरक्षा कोष तथा कम्पनीमा दर्ता भएर सञ्चालनमा रहेका संस्थागत विद्यालयसम्बन्धी प्रावधान व्यवहारिक नभएको भन्दै पुनर्विचार आवश्यक रहेको बताएका हुन् । पूर्ण छात्रवृत्ति उपलब्ध गराउने व्यवस्था लागू भए शुल्क वृद्धि भई श्रमजीवी अभिभावकलाई थप बोझ पर्ने र मध्यम आय भएका परिवारका बालबालिकाले विद्यालय छोड्नुपर्ने अवस्था सिर्जना हुने तर्कसहित उक्त प्रावधान पुनः परिमार्जन गर्नुपर्ने धारणा नेसनल प्याब्सनले प्रस्तुत गरेको छ। त्यस्तै पूर्व–प्राथमिक तहलाई दुई वर्षमा सीमित गर्ने व्यवस्था अन्तर्राष्ट्रिय मान्यताविपरीत भएको भन्दै यसलाई तीन वर्ष कायम गर्नुपर्नेमा जोड दिइएको थियो ।

१४- रमेश भुसालको संस्मरणात्मक कृति ‘छालबाटो’लाई २०८१ को ‘पद्मश्री साहित्य पुरस्कार’ अर्पण गरिएको छ । खेमलाल हरिकला लामिछाने प्रतिष्ठानले मेश भुसालको संस्मरणात्मक कृति ‘छालबाटो’लाई २०८१ को ‘पद्मश्री साहित्य पुरस्कार’ अर्पण गर्ने निर्णय गरेको अध्यक्ष जीवा लामिछानेले जानकारी दिएका छन् ।  २०८१ मा प्रकाशित तथा यस प्रतिष्ठानलाई प्राप्त नेपाली साहित्यका २०३ वटा पुस्तकमध्ये गत असार १५ गते विस्तारित सूची र साउन १५ गते उत्कृष्ट संक्षिप्त सूची प्रकाशित भएको थियो । ती कृतिमध्ये पुरस्कार चयन समितिको सिफारिस अनुसार रमेश भुसालको संस्मरणात्मक कृति ‘छालबाटो’लाई २०८१ को ‘पद्मश्री साहित्य पुरस्कार’ अर्पण गर्ने निर्णय गरिएको हो । प्रतिष्ठानले प्रत्येक वर्ष नेपाली साहित्य, संगीत र कलाको क्षेत्रमा दीर्घसाधना गरेर उत्कृष्ट योगदान पुर्याएका दीर्घसाधकलाई गरिने पद्मश्री साधना सम्मान यस वर्ष नेपाली शिक्षा परिषद्की अध्यक्ष रमा शर्मालाई अर्पण गर्ने निर्णय गरेको लामिछानेले जानकारी दिएका छन् । आफ्नो सम्पूर्ण जीवन भाषा, साहित्य, संस्कृति र कलाको उन्नयनमा समर्पित रमा शर्माका अन्वेषण, समालोचना, जीवनी, निबन्ध, भाषा, बालसाहित्य लगायतका करिब दुई दर्जन पुस्तकहरू प्रकाशित छन् । त्यसैगरी, समाजका विविध क्षेत्रमा उत्कृष्ट योगदान पुर्याएवापत प्रदान गरिने ‘पद्मश्री गौरव पुरस्कार’ यस वर्ष प्रा. डा. अभिनारायण सुवेदीलाई प्रदान गर्ने निर्णय गरिएको छ । नेपाली र अङ्ग्रेजी दुवै भाषामा कलम चलाउने निबन्धकार, समालोचक, भाषाविद्, नाटककार, अनुवादक तथा कवि प्रा. डा.अभि सुवेदीका करिब तीन दर्जन कृति प्रकाशित छन् । उहाँ साहित्य सिर्जना तथा समसामयिक लेखनमा अत्यन्तै सक्रिय छन् । यी पुरस्कारको राशि जनही अक्षरेपी तीन लाख नगद तथा सम्मानपत्र रहेको छ । यी पुरस्कार तथा सम्मान कोजाग्रत पूर्णिमाको दिन अर्पण गरिने प्रतिष्ठानले जनाएको छ । 

१५-  इन्द्रजात्राका लागि काभ्रेको नाला जंगलबाट ल्याइएको यःसी अर्थात लिङ्गो नगर प्रवेश गराइएको छ ।  नेपाल पञ्चाङ्ग निर्णायक समितिले दिएको साइतमा यस वर्षको इन्द्रजात्राका लागि लिङ्गो नगर प्रवेश गराइएको हो । आइतबार बिहान भोटाहिटीबाट लिङ्गो नगर प्रवेश गराइएको गुठी संस्थानले जनाएको छ । गुठी संस्थानका अनुसार लिङ्गोलाई भाद्र १९ गते बिहान १० बजेर ३१ मिनेटको साइतमा इन्द्रध्वजोत्थान गरिने छ भने भाद्र २१ गते इन्द्रजात्रा मनाइने भएको छ । जात्राको तयारीस्वरुप श्रीगणेश, श्रीभैरव र श्रीकुमारीको रथ तयारीको कार्य समेत सुरु गरिएको छ । तीनै वटा रथ तान्न सुरु गरिने इन्द्रजात्राको मुख्य दिन राष्ट्रप्रमुख वसन्तपुर दरबार क्षेत्रमा जाने परम्परा रहेको छ ।

१६- चिनियाँ राष्ट्रपति सी जिनपिङले भारतीय प्रधानमन्त्री मोदीसँगको द्विपक्षीय भेटमा ड्र्यागन र हात्ती एकसाथ आउनु धेरै महत्त्वपूर्ण भएको बताएका छन् । मिडिया रिपोर्टका अनुसार सी जिनपिङले विश्व परिवर्तनतर्फ अघि बढिरहेको बताउदै चीन र भारत विश्वका दुई सबैभन्दा प्राचीन सभ्यता र दुवै विश्वका सबैभन्दा बढी जनसंख्या भएका देश भएको बताएका छन् । सी जिनपिङले भने- 'दुबैका लागि मित्र रहनु, असल छिमेकी हुनु र ड्र्यागन र हात्ती एकसाथ आउनु धेरै महत्त्वपूर्ण छ ।' यसअघि, मोदीले सोही बैठकमा भारत र चीनबीचको सम्बन्धले सकारात्मक दिशा पाएको बताएका थिए । सांघाई सहयोग संगठनको बैठक ३१ अगस्टदेखि १ सेप्टेम्बरसम्म चीनको तियानजिनमा हुँदैछ।  मोदी र सी जिनपिङ बाहेक रुसी राष्ट्रपति पुटिन पनि यसमा सहभागी हुँदैछन् ।

१७-  नेपाल–भारत जोड्ने बनबासा पक्की पुलमा चारपांग्रे सवारीसाधन सञ्चालनमा रोक लगाइएको छ । कञ्चनपुरको भीमदत्त नगरपालिका–११, गड्डाचौकीस्थित महाकाली नदीमा पानीको बहाव बढेपछि उक्त पुलमा चारपांग्रे सवारीको आवतजावत बन्द गरिएको प्रहरीले जनाएको छ । प्रहरीका अनुसार आइतबार बिहानदेखि महाकाली नदीमा पानीको बहाव १, २८, ५६० क्युसेक पुगेपछि पानीको बहाव बढदो क्रममा रहेकाले चार पाङ्ग्रे र र तिन पाङ्ग्रे सवारी साधन चलाउन रोक लगाइएको छ ।

१८- नेपाली बजारमा आज सुनको मुल्य अहिलेसम्मकै उच्च भएको छ । नेपाल सुनचाँदी व्यवसायी महासङ्घका अनुसार आइतबार छापावाल सुन तोलाको ३ हजारले बढेर तोलाको २ लाख ३ हजार ६ सयमा कारोबार भइरहेको छ । यसअघि शुक्रबार सुनको मुल्य तोलाको २ लाख ६ सयमा कारोबार भएको थियो । यो सुनको अहिलेसम्मकै उच्च मुल्य हो । यस्तै, आज चाँदीको मूल्य पनि बढेको छ । महासङ्घका अनुसार आज चाँदी तोलाको ६५ रुपैयाँले बढेर २४२५ रुपैयाँमा कारोबार भइरहेको छ । यसअघि शुक्रबार चाँदी तोलाको २३६० मा कारोबार भएको थियो ।

१९- चीनको तियानजिनमा रहेका प्रधानमन्त्री केपी शर्मा ओलीले जिनान जिल्लाको सिआओझानस्थित धान उत्पादन विशेष  क्षेत्रको अवलोकन भ्रमण गरेका छन् । आइतबार प्रधानमन्त्री ओलीसहितको नेपाली प्रतिनिधिमण्डलले  सिआओझानस्थित धान उत्पादन विशेष  क्षेत्रको भ्रमण गरेको प्रधानमन्त्रीको सचिवालयले जानकारी दिएको छ । सो अवसरमा नेपालका लागि चिनियाँ राजदुत चेन सोङको पनि उपस्थिति रहेको थियो ।

२०- म्यानचेस्टर युनाइटेडले इङलिश प्रिमियर लिग अन्तर्गतको खेलमा बर्नलीमाथि संघर्षपूर्ण जित हासिल गरेको छ । गएराती सम्पन्न खेलमा म्यानचेस्टर युनाइटेडले बर्नलीलाई ३-२ गोल अन्तरले पराजित गरेको हो । म्यानचेस्टर युनाइटेडको जितमा ब्रयान एम्बेउमो र ब्रुनो फेर्नानडेजले एक एक गोल गरेका थिए भने एक गोल बोर्न माउथका जोस कुलेनले आत्मघाती गरेका थिए । त्यसैगरी बर्नलीका लागि लिले फोस्टर र जैडोन एन्थोनीले एक एक गोल गरेका थिए । यो यस सिजनमा म्यानचेस्टर युनाइटेडको तेस्रो खेलमा पहिलो जित हो । युनाइटेडले यस अघि एक खेल हार बेहोरेको थियो भने एक खेल बराबरी खेलेको थियो । त्यस्तै बर्नलीको यस सिजनमा तेस्रो खेलमा यो दोस्रो हार हो ।