आज दिनभरका प्रमुख २० समाचार बुलेटिन

काठमाडौँ । आज देश विदेशका प्रमुख २० समाचार यस प्रकार रहेका छन् ।

१- प्रतिनिधिसभाबाट भूमि सम्बन्धी केही नेपाल ऐन संशोधन विधेयक पारित भएको छ । आजको बैठकमा भूमि व्यवस्था, सहकारी तथा गरिबी निवारण मन्त्री बलराम अधिकारीले पेस गरेको ‘भूमि सम्बन्धी केही नेपाल ऐनलाई संशोधन गर्ने विधेयक २०८२ पारित गरियोस भन्ने प्रस्ताव माथि छलफल गरियोस्’ भन्ने प्रस्ताव बहुमतले पारित गरेको हो । प्रतिनिधि सभा अन्तर्गतको कृषि, सहकारी तथा प्राकृतिक स्रोत समितिले यही भदौ ५ गते यो विधेयक पास गरेर भदौ ६ गते सभामा विधेयकको प्रतिवेदन पेस गरेको थियो । प्रतिनिधिसभाले पारित गरेपछि अब यो विधेयक राष्ट्रिय सभामा जनाए छ भने राष्ट्रिय सभाले पनि पास गरेपछि पुन: प्रतिनिधिसभामा आउने छ । प्रतिनिधिसभामा फर्किएपछि सभामुख हुँदै राष्ट्रपतिकहाँ पुग्छ र  राष्ट्रपतिले प्रमाणीकरण गरेपछि ऐनका रुपमा रुपान्तरित हुन्छ ।

२- राष्ट्रिय स्वतन्त्र पार्टी (रास्वपा) का नेता डा. अरनिको पाँडेलाई जिल्ला अदालत काठमाडौंले धरौटीमा छोड्न आदेश दिएको छ । शुक्रबार न्यायाधीश ध्रुवराज कार्कीको इजलासले उनलाई २० हजार धरौटीमा छोड्न आदेश दिएको हो । प्रहरीले बयानका लागि पाँडेलाई शुक्रबार बिहान जिल्ला अदालत काठमाडौंमा उपस्थित गराएको थियो । पाँडेको बयान सकिएपछि थुकछेक बहस पछि अदालतले पाँडेलाई धरौटीमा छोड्न आदेश दिएको छ । उनीविरुद्ध विद्युतीय कारोबार ऐनअन्तर्गत मुद्दा दर्ता भएको थियो । बिहीबार जिल्ला अदालत काठमाडौंले उनीविरुद्धको कसुरमा अनुसन्धानका लागि चार दिनको म्याद दिएको थियो । पाँडेविरुद्ध एक महिलाले विद्युतीय कारोवार ऐनअन्तर्गतको कसुरमा ब्युरोमा उजुरी दिएपछि उनलाई हिरासतमा लिइएको थियो ।

३- नेपाली काँग्रेसले राज्य व्यवस्था तथा सुशासन समितिको सभापतिबाट राजीनामा दिएका सांसद रामहरि खतिवडा संसदीय सुनुवाइ समिति (संयुक्त) मा लगेको छ । सुनुवाइ समितिको सभापतिबाट ईश्वरी न्यौपाने राजीनामा दिएर राज्य व्यवस्था समितिको सभापति भनेपछि उनको स्थानमा खतिवडालाई लगिएको हो । शुक्रबार बसेको प्रतिनिधि सभाको बैठकमा उपसभामुख इन्दिरा रानामगरले खतिवडालाई संसदीय सुनुवाइ समितिमा पठाउन प्रस्ताव गरेकी थिइन् । सो प्रस्ताव बैठकले सर्वसम्मतिले स्वीकृत गरेको थियो । संघीय निजामती विधेयक अन्तर्गत कुलिङ पिरियडमा भएको हेरफेरको नैतिक जिम्मेवारी लिदै खतिवडाले सभापतिबाट राजीनामा दिएका थिए । कांग्रेसले खतिवडालाई सुनुवाई समितिको सभापति बनाउने चर्चा समेत रहेको छ ।

४- अखिल नेपाल फुटबल संघ (एन्फा) ले बंगलादेशविरुद्ध दुई मैत्रीपूर्ण खेल खेल्ने टिमको घोषणा गरेको छ । राष्ट्रिय टिमका प्रशिक्षक म्याट रसले बंगलादेशसँग दुई मैत्रीपूर्ण खेल खेल्ने २३ सदस्यीय टिमको घोषणा गरेका हुन् । नेपाली टिममा  किरण चेम्जोङ (कप्तान ), आदित्य शाक्य, अमित लामा,  अनन्त तामाङ, अभिषेक लिम्बु, मणि कुमार लामा, मनिष डाँगी, रणदिप पौडेल, रोहन कार्की, अन्जन बिष्ट, रोहित चन्द, अरिक बिस्ट, समीर तामाङ, दीप कार्की, दिनेश हेन्जन, गिलेस्पे जङ्ग कार्की, कुशल देउवा, लेकेन लिम्बु, श्रीजन राज, सुवास ठकुरी बम,  सुमन श्रेष्ठ, टिकेन्द्र थापा र योगेश गुरुङ रहेका छन्  । नेपालले ६ र ९ सेप्टेम्बरमा त्रिपुरेश्वरस्थित दशरथ रंगशालामा बंगलादेशसँग दुई अन्तर्राष्ट्रिय मैत्रीपूर्ण खेल खेल्दैछ ।

५- भारत सरकारले पछिल्लो जीडीपी तथ्याङ्क सार्वजनिक गरेको छ । यस अनुसार, अप्रिल-जुन त्रैमासिकमा भारतीय अर्थतन्त्र ७.८ प्रतिशतको दरले बढेको तथ्याङ्क तथा कार्यक्रम कार्यान्वयन मन्त्रालय जानकारी दिएको छ । आर्थिक वर्ष २०२४-२५ को पहिलो त्रैमासिकमा ६.५ प्रतिशत को वृद्धि दर थियो । पछिल्ला तथ्याङ्कहरू अपेक्षा गरिएको भन्दा राम्रो देखिएको छ । यस अवधिमा जीडीपी वृद्धि दर ६.७ प्रतिशत हुने अनुमान गरिएको थियो । यो पछिल्लो पाँच त्रैमासिकमा सबैभन्दा धेरै वृद्धि हो । चालू आर्थिक वर्षको पहिलो त्रैमासिकमा जीडीपी वृद्धि मुख्यतया कृषि क्षेत्रको राम्रो प्रदर्शनको कारणले भएको रिपोर्टमा उल्लेख छ । कृषि तथा सम्बद्ध क्षेत्रले यस आर्थिक बर्षको पहिलो त्रैमासिकमा ३.४ प्रतिशतको वृद्धि हासिल गरेको छ, जबकी अघिल्लो आर्थिक बर्षको पहिलो त्रैमासिकमा यो १.५ प्रतिशत मात्र रहेको थियो । यो वृद्धि अमेरिकी भन्सार शुल्क लागू हुनुभन्दा पहिले रेकर्ड गरिएको हो ।

६- अख्तियार दुरूपयोग अनुसन्धान आयोगले गैरकानूनी सम्पत्ति आर्जन गरी भ्रष्टाचार गरेको आरोपमा नापी अधिकृतविरुद्ध पाँच करोड बढीको भ्रष्टाचार मुद्दा दायर गरेको छ । शुक्रबार विशेष अदालत काठमाडौँमा आयोगले नापी कार्यालय भैरहरवा रुपन्देहीमा कार्यरत नापी अधिकृत सुग्रीव यादवविरुद्ध ५ करोड ७९ लाख ६२ हजार ४४० रुपैयाँ विगो माग दाबी गर्दै आरोप-पत्र दायर गरेको हो । अधिकृत यादवले माथिल्लो विभागीय प्रमुख र राजनीतिक व्यक्तिहरूलाई प्रभावमा पारी प्रमुख नापी अधिकृत (उपसचिव) कार्यालय प्रमुख रहने दरबन्दी रिक्त बनाइ,वैदेशिक अध्ययनमा गएका कर्मचारीको पद,दरबन्दी कायम गरी दशौं वर्ष निमित्त कार्यालय प्रमुख पदमा रही सरकारी जग्गा प्लट मिलान गर्ने नाममा सार्वजनिक जग्गाहरू व्यक्तिको नामा पारी करौंडोको आर्थिक चलखेल गरेको अनुसन्धानका क्रममा पाइएको आयोगले बताएको छ । आयोगले सार्वजनिक पद धारण गरेको मिति २०५३/०३ /१३ गतेदेखि  २०९१/०३/१६ गतेसम्मको जाँच अवधिमा ९ करोड ३ लाख ९५ हजार  ४४४ रुपैयाँ आर्जन गरेको देखिएको तर सोही अवधिमा यादवले  १४ करोड ८३ लाख ५७ हजार  ८८४ रुपैयाँ बराबरको सम्पत्ति खर्च तथा लगानी गरेको र सोही अवधिमा ५ करोड ७९ लाख ६२ हजार  ४४० रुपैयाँ खर्च तथा लगानीको स्रोत पुष्टि गर्न नसकेको बताएको छ । 

७- थाइल्याण्डको संवैधानिक अदालतले प्रधानमन्त्री पाटोङटार्न शिनावात्रालाई पदबाट हटाएको छ र उनको मन्त्रिपरिषद् विघटन गरेको छ । योसँगै उनी २००८ पछि संवैधानिक अदालतले पदबाट हटाइने थाइल्याण्डकी पाँचौं प्रधानमन्त्री बनेकी छिन् । कम्बोडियाका पूर्व प्रधानमन्त्री हुन सेनसँगको उनको फोन वार्ता लिक भएपछि विवाद उत्पन्न भएपछि जुलाईमा उनलाई निलम्बन गरिएको थियो । पाटोङटार्न थाइल्याण्डकी सबैभन्दा कान्छी प्रधानमन्त्री थिइन् । उनले ३७ वर्षको उमेरमा पदभार ग्रहण गरेकी थिइन् । उनी देशको दोस्रो महिला प्रधानमन्त्री पनि बनिन् । उनीभन्दा अगाडि उनकी काकी यिंगलक शिनावात्रा २०११ देखि २०१४ सम्म देशको प्रधानमन्त्री थिइन् । पाटोङटार्नका बुबा थाक्सिन शिनावात्रा पनि प्रधानमन्त्री भइसकेका छन् ।  पाटोङटार्न थाई अर्बपति र पूर्व प्रधानमन्त्री थाक्सिन शिनावात्राकी छोरी हुन्। उनले थाइल्याण्डको उत्कृष्ट विद्यालयहरू मध्ये एकमा अध्ययन गरिन् र त्यसपछि बेलायतको सरे विश्वविद्यालयमा पढिन्। यसपछि, उनी परिवारको 'रेनोन्डे' होटल समूहमा सामेल भइन् । उनलाई उनको उपनाम 'उङ इङ्ग' ले पनि चिनिन्छ । उनी २०२१ मा फेउ थाई पार्टीमा सामेल भइन् र २०२३ मा पार्टी नेता बनिन् । गत वर्ष, थाई संसदले उनलाई उनको पूर्ववर्ती स्रेथा थाभिसिनको स्थानमा निर्वाचित गरेको थियो । मन्त्रिपरिषद् नियुक्तिको नियम तोडेको कारण संवैधानिक अदालतले थाभिसिनलाई पदबाट हटाएको थियो । शिनावात्रा परिवारले दशकौंदेखि थाई राजनीतिमा प्रभुत्व जमाउँदै आएको छ र पदबाट पाटोङटार्नको बहिर्गमन यस राजनीतिक परिवारको लागि ठूलो धक्का भएको मानिएको छ ।

८- मनाङको प्रतिनिधि सभा निर्वाचन क्षेत्र नम्बर १ को प्रदेश सभा निर्वाचन क्षेत्र नम्बर २ को गण्डकी प्रदेशको प्रदेश सभा सदस्य पदको निर्वाचन कार्तिक १७ गते हुने भएको छ ।निर्वाचन आयोगले राजीव गुरुङ (दीपक मनाङे) को सांसद पद गएपछि खाली भएको स्थानमा कार्तिक १७ गते उपनिर्वाचन हुने निर्णय गरको जानकारी दिएको छ । सर्वोच्च अदालतले २०८१ कार्तिक २० गतेदेखि रिक्त भएको प्रदेश सभा सचिवालय, गण्डकी प्रदेश, पोखराबाट जानकारी हुन आएको र प्रदेश सभाको कार्यकाल ६ महिनाभन्दा बढी अवधि बाँकी रहदै प्रदेश सभाको कुनै सदस्यको स्थान रिक्त भएमा त्यस्तो स्थान जुन निर्वाचन प्रणालीबाट पूर्ति भएको थियो सोही प्रक्रियाद्वारा पूर्ति गरिनेछ भन्ने नेपालको संविधानको धारा १७६ को उपधारा ८ अनुसार उपनिर्वाचनको मिति तोकिएको आयोगले जानकारी दिएको छ ।

९- पूर्व भारतीय क्रिकेटर रोजर बिन्नीले भारतीय क्रिकेट कन्ट्रोल बोर्ड (बीसीसीआई) को अध्यक्ष पदबाट राजीनामा दिएका छन् । रिपोर्टका अनुसार बिन्नीको राजीनामापछि बोर्डका उपाध्यक्ष राजीव शुक्लालाई कार्यवाहक अध्यक्ष बनाइएको छ । यसअघि ६५ वर्षीय शुक्ला बीसीसीआईका उपाध्यक्ष थिए । पीटीआईको रिपोर्टका अनुसार वर्तमान अध्यक्ष रोजर बिन्नी ७० बर्ष पुगेकाले बोर्डको नियम अनुसार पद छोडेको बताइएको छ । बिन्नीले २०२२ मा सौरभ गांगुलीको स्थानमा बोर्डको अध्यक्षको पदभार ग्रहण गरेका थिए । उनी जुलाई १९ मा ७० वर्षका भएका थिए । रिपोर्टका अनुसार, राजीव शुक्लाले केही महिनाको लागि कार्यभार सम्हाल्नेछन्। नयाँ अध्यक्ष निर्वाचित नभएसम्म उनी कार्यवाहक अध्यक्षको रूपमा काम गर्नेछन् । शुक्ला २०२० देखि बीसीसीआईको उपाध्यक्षको रूपमा काम गर्दै आएका छन् । बीसीसीआईको संविधान अनुसार कुनै पनि अधिकारीले ७० वर्षको उमेर पछि आफ्नो पद छोड्नु पर्छ ।

१०- नेपाल ए क्रिकेट टिमले भारतको आसाम राज्यको टिमलाई दोस्रो खेलमा फराकिलो जित हासिल गरेको छ । शुक्रबार सम्पन्न खेलमा नेपाल ए ले आसाम टिमलाई ९६ रनले पराजित गरेको हो । नेपाल ए ले दिएको १७४ रनको लक्ष्य पछाएको आछाम टिमले १५.२ ओभरमा अल आउट हुदै ७७ रन बनाएको थियो । यो जितपछि नेपालले ५ खेलको सिरिजमा कमब्याक गर्दै १-१ को बराबरी गरेको छ । यस अघि बर्षाले प्रभावित पहिलो खेल आसामले जितेको थियो । अब तेस्रो खेल भोली खेल्ने तालिका रहेको छ ।

११- प्रधानमन्त्री केपी शर्मा ओलीले आफ्नो आसन्न चीन भ्रमण बारे संसदमा जानकारी गराएका छन् । प्रधानमन्त्री ओलीले चीन भ्रमणका क्रममा रुसका राष्ट्रपति भ्लादमिर पुटिनसहित, माल्दिभ्स, लाओस, भियतनामका राष्ट्र प्रमुखसँग भेटवार्ता तय भएको जानकारी दिएका छन् । साथै प्रधानमन्त्री ओलीले चीन भ्रमणका क्रममा राष्ट्रपति सी जीङपीङसँग दुई पक्षीय भेटवार्ता हुने जानकारी दिएका छन् । प्रधानमन्त्री ओलीले सेप्टेम्बर १ मा तियानजिनमा हुने शिखर सम्मेलनलाई सम्बोधन गर्ने कार्यक्रम रहेको छ । प्रधानमन्त्रीको भ्रमण दलमा प्रधानमन्त्रीकी श्रीमती राधिका शाक्य, शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्री प्रसाद पाण्डे, सांसद पूर्ण बहादुर खड्का, प्रधानमन्त्रीका आर्थिक तथा विकास सल्लाहकार डा. युवराज खतिवडा, सांसद छबिलाल विश्वकर्मा र उच्चपदस्थ सरकारी अधिकारीहरू समावेश हुने जानकारी दिएका छन् ।

१२- सभामुख देवराज घिमिरेले रास्वपा र राप्रपाका सांसदहरुले लगातार संसदमा विरोध जारी राखेकोप्रति चिन्ता व्यक्त गरेका छन् । सभामुख घिमिरेले शुक्रबारको बैठक शुरु हुनु अघि आफ्नो धारणा राख्दै भिजिट भिसा प्रकरणको छानबिनलगायतका माग राखी लामो समयदेखि प्रतिपक्षी बेञ्चमा रहेका माननीय सदस्यज्यूहरू नियमित बैठकमा सहभागी नभएको र यस सम्बन्धमा सहमतिका लागि आफुले सम्भाव्य सबै पहल र संवादको मार्ग अपनाएको बताएका छन् । उनले यसका बाबजुत पनि सहमतिका लागि प्रयत्नशील रहेको बताउदै सदन सुचारू बनाउन सरकार र राजनीतिक दलहरूबीच हुनुपर्ने छलफल र संवाद नभएकोमा चिन्तित रहेको बताएका हुन् । उनले भने- 'यसरी बैठक सुरू हुनासाथ "असहमति प्रदर्शन" गर्ने र बाहिरिने प्रवृत्ति संस्थागत लोकतान्त्रिक प्रणाली र संसदीय अभ्यासका दृष्टिले दीर्घकालीनरूपमा हानिकारक सावित हुनसक्छ । हामी भविष्यलाई के सन्देश दिइरहेका छौं भन्ने विषयमा सबै सचेत रहनु आवश्यक छ । संसद केवल असहमति अभिव्यक्त गर्ने स्थलमात्र होइन; राष्ट्रिय सहमतिको आवाज प्रकट गर्ने थलो पनि हो ।' उनले अहिले संघीय लोकतान्त्रिक गणतन्त्रलाई सुदृढ पार्ने प्रयोजनका लागि संघीयतासँग प्रत्यक्ष सम्बन्धित विधेयकहरूलाई पारित गर्ने प्रक्रियामा रहेको उल्लेख गर्दै यी विधेयकहरूमा सबै माननीयज्यूहरूको गम्भीर र रचनात्मक बहस अपरिहार्य रहेको बताएका छन् । सभामुख घिमिरेले समितिहरूमा जस्तै सभामा पनि संसदको गर्भमा रहेका यी कानूनले सबै माननीयहरूको बहस खोजिरहेको महसुस गरेको बताउदै आज प्रधानमन्त्रीले सभामा बोल्नका लागि समय लिनुभएको छ । सबै माननीयहरूलाई बैठकमा सहभागी हुन आग्रह गरेका छन् । सभामुख घिमिरेले सरकार, प्रतिपक्ष र सत्तापक्षमा रहेका दल तथा सबै सदस्यहरूलाई संवादको वातावरण सृजना गरी सदनलाई आफ्नो मूल लयमा फर्काउन अपिल गरेका छन् ।

१३- राष्ट्रिय स्वतन्त्र पार्टी (रास्वपा) र राप्रपाले आज पनि प्रतिनिधि सभाको बैठक बहिस्कार गरेका छन् । प्रतिनिधि सभाको बैठकमा रास्वपाका सांसद गणेश पराजुली र राप्रपाकी सांसद ज्ञानेन्द्र शाहीले आफ्नो धारणा राखेपछि आजको बैठक बहिष्कार गरेका हुन् । रास्वपा सांसद पराजुलीले लिपुलेकका विषयमा प्रधानमन्त्री केपी शर्मा ओलीले भारत र चीनसँग स्पष्ट कुरा राख्न आग्रह गर्दै भिजिट भिसा प्रकरणमा जारी रहेको विरोध अहिले पनि जारी रहेको बताए । रास्वपा र राप्रपाले भिजिट भिसा प्रकरणमा आफुहरुको विरोध जारी रहेको बताउदै उनीहरुले छानबिनका लागि उच्चस्तरीय आयोग बनाउनुपर्ने माग राख्दै आएका छन् । दुवै दलले भिजिट भिसा प्रकरणमा गत जेठ १३ गतेदेखि नै संसदमा विरोध गर्दै आएका छन् ।

१४- काठमाडौं महानगरपालिका–३२ जडीबुटीस्थित आकासे पुलनजिक रोकिराखेको बसमा स्कुटर ठोक्किँदा दुई जनाको मृत्यु भएको छ ।  प्रहरीका अनुसार आज बिहान भएको दुर्घटनामा गम्भीर घाइते भएका काभ्रेपलाञ्चोकको पाँचखाल नगरपालिका-२ होक्सेका २३ वर्षीय नितेश नेपाल र नवलपरासी (बर्दघाट सुस्ता पश्चिम) सुनवल नगरपालिका–१ का २२ वर्षीय शिरीष पौडेलको उपचारका क्रममा मृत्यु भएको हो । प्रहरीले सडक किनारमा बस राखेका चालकलाई नियन्त्रणमा लिएको जनाएको छ ।

१५- आगामी असोज ३ गते प्रदर्शन हुने भनिएको फिल्म ‘सोल्टिनी’ भाइटिकामा रिलिज हुने भएको छ । असोज ३ मा जारी-२ आउने भएपछि फिल्मको प्रदर्शन मिति एक महिना सारिएको हो । अब यो फिल्म कात्तिक ६ गतेबाट प्रदर्शनमा आउने निर्माण पक्षले जानकारी दिएको छ । शुक्रबार फिल्मको चारवटा पोस्टर सार्वजनिक गर्दै नयाँ प्रदर्शन मितिबारे जानकारी गराइएको हो । चार पोस्टरले फिल्मको कथावस्तु प्रेम, लिम्बू संस्कृति र ग्रामीण परिवेशमा आधारित रहेको जनाउँछन् । एक पोस्टरमा फिल्मका मुख्य जोडी प्रकाश सपूत र परीक्षा लिम्बूको रोमान्टिक केमेस्ट्री देख्न सकिन्छ ।  अर्जुन सुवेदीको निर्देशनमा बनेको फिल्ममा प्रकाश र परीक्षासहित विल्सन विक्रम राई, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडा लगायतले अभिनय गरेका छन् । अर्जुन सुवेदी र कुमार भट्टराईको लेखन रहेको फिल्मलाई सुसन प्रजापतिले छायांकन गरेका हुन् । यसमा प्रशान्त सिवाकोटी र हर्कुलस बस्नेतको संगीत रहेको छ ।

१६- सरकारले नेपाल प्रहरीको ३२औँ महानिरीक्षक (आईजीपी) मा एआईजी चन्द्रकुवेर खापुङ नियुक्त गरेको छ । शुक्रबार प्रधानमन्त्री निवास बालुवाटारमा बसेको मन्त्रिपरिषद् बैठकले खापुङलाई आईजीपी बनाउने निर्णय गरेको हो । खापुङ पहिलो वरीयताका एआईजी थिए । वर्तमान आईजीपी दीपक थापा यही भदौ १७ गते मध्यरातिबाट अनिवार्य अवकाशमा जाँदैछन् ।

१७- नेपाल शिक्षक महासंघले आज नेकपा माओवादी केन्द्रको पार्टी कार्यलयमा धर्ना दिएका छन् । पहिलो चरणको आन्दोलनको कार्यक्रम अन्तर्गत आज विहान ११ बजे देखि दिउसो १ बजेसम्म २ घण्टा पेरिस डाँडास्थित नेकपा माओवादी केन्द्रको केन्द्रीय कार्यालयमा धर्ना बसी ध्यानाकर्षण पत्र बुझाउने कार्यक्रम रहेको महासंघले जनाएको छ । शिक्षक महासंघले बिहिबार नेकपा एमाले र बुधबार नेपाली कांग्रेसको कार्यलय सानेपामा धर्ना दिएको थियो ।  त्यस्तै महासंघले आज देशका सबै पालिकामा र भदौ १५ गते सबै जिल्लाका समन्वय एकाइमा प्रतिनिधिमूलक उपस्थितिमा ध्यानाकर्षण पत्र बुझाउने कार्यक्रम तय गरेको छ । प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिले विद्यालय शिक्षा विधेयक, २०८० पारित गरेपछि त्यसमा रहेका प्रावधानमा असहमति जनाउदै महासंघले आन्दोलनका कार्यक्रम घोषणा गरेको हो ।

१८- रुसले युक्रेनमा ५९८ ड्रोन र ३१ क्षेप्यास्त्र प्रहार गरेको छ । यस आक्रमणमा ४ बालबालिकासहित २१ जनाको मृत्यु भएको मिडिया रिपोर्टमा उल्लेख छ । यसबाहेक आक्रमणमा ४५ जना घाइते भएका छन् । अमेरिकी राष्ट्रपति ट्रम्प र रुसी राष्ट्रपति भ्लादिमिर पुटिनको अलास्कामा भएको भेटघाटको १३ दिनपछि यो भिषण आक्रमण भएको हो । आक्रमण बारे युक्रेनी राष्ट्रपति भोलोदिमिर जेलेन्स्कीले रुसले शान्तिको सट्टा क्षेप्यास्त्र रोजिरहेको बताएका छन् ।  रुसी आक्रमणमा ब्रिटिश काउन्सिलको कार्यालय क्षतिग्रस्त भएको छ । बेलायती सरकारी सम्पत्ति रुसी आक्रमणमा परेको यो पहिलो पटक हो । त्यस्तै आक्रमणमा युरोपेली संघका मिसन भवनहरूमा क्षति पुगेको छ । यो आक्रमणपछि बेलायत र युरोपेली संघले रुसलाई चेतावनी दिएका छन्, ह्वाइटहाउसले वार्ता जारी रहने बताएको छ । आक्रमणमा किभ कार्यालयहरू क्षतिग्रस्त भएपछि बेलायत र युरोपेली संघले रुसी राजदूतहरूलाई बोलाएको छ ।

१९- अछाममा छाउगोठमा सुतेका दुई जनाको ढुंगाले किचेर मृत्यु भएको छ । प्रहरीका अनुसार अछामको पञ्चदेवल विनायक नगरपालिका–८, सेलापानीस्थित चुरखोली टोलकी ३५ वर्षीया निम खनाल र मंगलसेन नगरपालिका–६ का गोरे भण्डारीकी सात वर्षीया छोरी कविताको छाउगोठमा सुतेका बेला ढुंगाले किचेर मृत्यु भएको हो । घाइते भएकी कविताकी आमालाई उपचारका निम्ति स्थानीय स्वास्थ्यचौकीमा पठाइएको प्रहरीले एभरेष्ट न्यूज एजेन्सीलाई जानकारी दिएको छ ।  

२०- नेपाली बजारमा आज सुनको मुल्य अहिलेसम्मकै उच्च भएको छ । नेपाल सुनचाँदी व्यवसायी महासङ्घका अनुसार शुक्रबार छापावाल सुन तोलाको १२ सयले बढेर तोलाको २ लाख ६ सयमा कारोबार भइरहेको छ । यसअघि विहिबार सुनको मुल्य तोलाको एक लाख ९९ हजार ४ सयमा कारोबार भएको थियो ।  सुनको मुल्य पहिलो पटक दुई लाख नाधेको हो । यस्तै, आज चाँदीको मूल्य पनि सामान्य बढेको छ । महासङ्घका अनुसार आज चाँदी तोलाको ५ रुपैयाँले बढेर २३६० रुपैयाँमा कारोबार भइरहेको छ । यसअघि विहिबार चाँदी तोलाको २३५५ मा कारोबार भएको थियो ।