प्रधानमन्त्री उद्धार कोषमा ६ घण्टामै उठ्यो २७ करोड ३३ लाख रुपैयाँ, निजी क्षेत्र अग्रपंक्तिमा

काठमाडौँ — रसुवा तथा भोटेकोशी क्षेत्रमा आएको विनाशकारी बाढीबाट प्रभावित नागरिकहरूको राहत, उद्धार तथा पुनर्स्थापनाका लागि प्रधानमन्त्री दैवी प्रकोप उद्धार कोषमा सहयोग रकम ओइरिने क्रम सुरु भएको छ। अर्थ मन्त्रालयका अनुसार बिहीबार पछिल्लो ६ घण्टाको छोटो अवधिमै विभिन्न १० वटा निजी संघसंस्थाबाट २७ करोड ३३ लाख रुपैयाँ सहयोग संकलन भएको छ। 

संकलित रकम एकद्वार प्रणालीमार्फत अर्थमन्त्री डा. स्वर्णिम वाग्लेलाई हस्तान्तरण गरिएको छ। यो विवरण अर्थ मन्त्रालयमै पुगेर बुझाइएको नगद तथा चेकको मात्रै भएको र अनलाइन एवं बैंक खातामार्फत सिधै जम्मा भएको रकम अध्यावधिक हुन बाँकी रहेको मन्त्रालयले जनाएको छ। 

कर्पोरेट क्षेत्रको ठूलो योगदान
विपद्को यस घडीमा निजी क्षेत्रका स्थापित कम्पनी तथा व्यावसायिक घरानाहरूले ठूलो रकम योगदान गरेका छन्। कोषमा मुख्य रूपमा योगदान गर्ने कम्पनीहरू: 

गोर्खा ब्रुअरी: १० करोड रुपैयाँ
ग्लोबल आइएमई बैंक: ५ करोड रुपैयाँ
कुमारी बैंक: ३ करोड रुपैयाँ
एनआईसी एशिया बैंक: २ करोड २१ लाख रुपैयाँ
एनसेल फाउन्डेसन: १ करोड रुपैयाँ
प्रभु महालक्ष्मी लाइफ इन्स्योरेन्स: ५१ लाख रुपैयाँ
 

राष्ट्रपतिको एक महिनाको पारिश्रमिक सहयोग
बाढी प्रभावित क्षेत्रमा राहत र उद्धारलाई थप तीव्र बनाउन राष्ट्रपति रामचन्द्र पौडेलले आफ्नो एक महिनाको पारिश्रमिक प्रधानमन्त्री दैवी प्रकोप उद्धार कोषमा प्रदान गर्ने घोषणा गर्नुभएको छ। राष्ट्रपति कार्यालयले बिहीबार एक विज्ञप्ति जारी गर्दै संकटको यस समयमा नागरिकको उद्धारमा सहयोग पुर्‍याउन उक्त रकम उपलब्ध गराउने उल्लेख गरेको छ। 

सरकारले हाल रसुवा र नुवाकोट लगायतका बाढी प्रभावित क्षेत्रमा राहत सामग्री वितरण, बेपत्ताहरूको खोज र क्षतिग्रस्त भौतिक पूर्वाधार (सडक तथा पुल) पुनर्निर्माणका लागि यो रकम परिचालन गर्ने तयारी गरेको छ। बाढीका कारण जलविद्युत आयोजना र राष्ट्रिय प्रसारण लाइनमा ठूलो क्षति पुगेपछि पुनर्स्थापना कार्यलाई सरकारले प्राथमिकतामा राखेको छ।