चौतारी संरक्षणमा जुट्दै ‘डिभिजन वन’

पुर्खाले बनाएका वरपीपलका चौतारी पछिल्लो समय मासिँदै जान थालेकोे छ । वरपीपलले हानिकारक कीराको नाश गरिदिने, बाह्रमास स्वच्छ हावा दिने भएकाले पर्यावरणीय दृष्टिकोणले पनि मानव जीवनमा अपरिहार्य मानिन्छ । वरपीपलको धार्मिक दृष्टिकोणलेसमेत उत्तिकै महत्व रहेको छ । विकासका नाउँमा होस या संरक्षण नहुँदा यस्ता पुख्र्यांैली सम्पदा नाश हुँदै जान थालेपछि यसको संरक्षणमा डिभिजन वन कार्यालय तनहुँ जुटेको छ । 

मानवजीवनका लागि चौतारी आवश्यक महसुस गरी संरक्षणको प्रयास थालिएको डिभिजन वन कार्यालय तनहुँका प्रमुख कोमलराज काफ्लेले बताउनुभयो । कार्यालयले अभियान नै सञ्चालन गरी पहल थालेपछि गाउँठाउँमा पुनःचौतारी हराभरा देखिन थालेको छ । 

बाटोघाटो हिँड्दा, थकाइ लाग्दा थकाइ मेटाउने, गाउँबेंसी गर्दा भारी बिसाउन, पुण्य प्राप्त हुन्छ भन्ने धार्मिक विश्वासले चौतारी बनाउने गरे पनि हाल त्यसतर्फ चासो कमी हँुदै गएका कारण चौतारी लोप हँुदै गएको पाइन्छ । 

मोटरबाटो लैजाँदा रुख ढालीदिने र मानिस चौतारीमा भन्दा एसी र पङ्खाबाट शीतल लिने गरेकाले नयाँ बिरुवा रोप्न नचाहने कार्यले चौतारी लोप हुँदै गएको उहाँले बताउनुभयो ।  

चौतारी संरक्षणका लागि अभियान सुरुआतसँगै त्यसका लागि स्थानीय तहका जनप्रतिनिधि, सामुदायिक वनका उपभोक्तालाई चौतारीको वातावरणीय महत्वका बारेमा प्रशिक्षणसमेत दिन थालिएको छ । 

चौतारी संरक्षणको पहल सुरुआत गरेसँगै गण्डकी प्रदेश सरकारको आर्थिक सहयोगमा गत वर्ष पाँच वटा चौतारा संरक्षण गरिएको कार्यालय सहायक वन अधिकृत राजकुमार श्रेष्ठले जानकारी दिनुभयो । प्रतिचौतारी रु एक लाख आर्थिक सहयोग र १० प्रतिशत जनसहभागितामा चौतारी संरक्षण गरिएको उहाँले बताउनुभयो । 

म्याग्दे गाउँपालिका–७ स्थित रिपा शिखर थुम्की सामुदायिक वन, म्याग्देकै सोही वडाको जनचेतना आमासमूह, व्यास नगरपालिकाको वडा नं १ स्थित अकला सामुदायिक वन, वडा नं १० स्थित सर्वज्योति आमासमूह र वडा नं ११ स्थित तनहुँसुर सामुदायिक होमस्टेमा चौतारा निर्माण गरिएको छ ।