मुस्ताङबाट कबड्डी- ५ को छायांकन सुरू

काठमाडौँ ।  नेपालको सफल फ्रेन्चाइज फिल्म ‘कबड्डी’ को अब पाँचौँ सिरिजको छायांकन शुरु भएको छ । चौथो भागलाई नै अन्तिम श्रृंखला भनिए पनि निर्माण पक्षले नयाँ कथामा कबड्डी- ५ को निर्माण शुरु गरेको हो । सोमबारबाट यो फिल्मको छायांकन मुस्ताङ जिल्लाको प्रसिद्ध धार्मिक तीर्थस्थल मुक्तिनाथ मन्दिरमा स्क्रिप्ट र क्यामेरा पूजा गरेपछि लार्जुङ बस्तीबाट शुरु गरिएको हो । 

फिल्ममा ‘कबड्डी’ सिरिजमा धेरैजसो कलाकार दोहोरिएका छन् भने नयाँ अनुहारको प्रवेश पनि भइरहेको छ । चौथौ सिरिजमा काम गरेका दयाहाङ राई र मिरुना मगरसहित विजय बराल, बुद्धि तामाङ, कमलमणि नेपाल, अरुणा कार्की, शिशिर वाङ्गदेल लगायत पाँचौं सिरिजमा पनि रहने छन् भने यस फिल्मबाट पूर्वमिस यूके नेपाल सिर्जना गुरुङले डेब्यु गर्दैछिन् ।  त्यस्तै यस फिल्ममा अभिनेत्री रिश्मा गुरुङ (मैयाँ) र्ट विपिन कार्कीको इन्ट्री भएको छ । विपिन तिहारपछि मात्र फिल्मको छायांकनमा जोडिने निर्माण पक्षले जानकारी दिएको छ । 

रामबाबु गुरुङको निर्देशनमा बन्ने फिल्मको छायांकन ७० प्रतिशत मुस्ताङमा र ३० प्रतिशत काठमाडौंमा हुनेछ । यस फिल्मको लेख्न उपेन्द्र सुब्बाको रहेको छ ।