एक सातामै २४ हजार सस्तियो सुन

काठमाडौं । नेपाली बजारमा सुनको मूल्यमा ठूलो गिरावट आएको छ। नेपाल सुनचाँदी व्यवसायी महासंघका अनुसार बिहीबार सुनको भाउ तोलामा ५ हजार १ सय रुपैयाँले घटेको हो ।

यस गिरावटसँगै आजका लागि छापावाल सुनको मूल्य प्रतितोला २ लाख ८६ हजार ७ सय रुपैयाँ कायम गरिएको छ। अघिल्लो दिन (बुधबार) सुन प्रतितोला २ लाख ९१ हजार ८ सय रुपैयाँमा कारोबार भएको थियो।

दुई दिनमै १५ हजारभन्दा बढीको गिरावट

नेपाली बजारमा सुनको मूल्यले पछिल्लो दुई दिनमै ठूलो धक्का बेहोरेको छ। गत मंगलबार सुनको भाउ प्रतितोला ३ लाख १ हजार ९ सय रुपैयाँको उच्च विन्दुमा कारोबार भएको थियो। तर, बुधबार र बिहीबार लगातार ओरालो लाग्दै दुई दिनमै तोलामा १५ हजार २ सय रुपैयाँले सुन सस्तिएको महासंघले जनाएको छ।

एक सातामा २४ हजार रुपैयाँले घट्यो

पछिल्लो एक साताको तथ्याङ्क हेर्ने हो भने सुनको मूल्यमा अझ ठूलो गिरावट देखिएको छ। गत हप्ताको बिहीबार नेपाली बजारमा सुन प्रतितोला ३ लाख ११ हजार १ सय रुपैयाँको ऐतिहासिक उचाइमा पुगेको थियो। उक्त मूल्यको तुलनामा यस बिहीबारसम्म आइपुग्दा एक सातामै सुन तोलामा २४ हजार ४ सय रुपैयाँले सस्तो भएको छ।

चाँदीको मूल्य पनि ओरालो

सुनसँगै चाँदीको मूल्यमा पनि उल्लेख्य गिरावट आएको छ। बिहीबार चाँदीको भाउ तोलामा ९० रुपैयाँले घटेर प्रतितोला ४ हजार ६ सय ५० रुपैयाँ कायम भएको छ। अघिल्लो दिन चाँदी प्रतितोला ४ हजार ७ सय ४० रुपैयाँमा कारोबार भएको थियो। यसअघि गत मंगलबार भने चाँदी प्रतितोला ४ हजार ९ सय २५ रुपैयाँसम्म पुगेको थियो।

अन्तर्राष्ट्रिय बजारमा बहुमूल्य धातुको मूल्यमा आएको उतारचढावकै प्रभाव नेपाली बजारमा पनि देखिएको व्यवसायीहरूले बताएका छन्।