काठमाण्डौमा साझाका तीन वटा बिजुली बस सञ्चालन, बाँकी ३७ वटा दशैँअघि नै ल्याइने

साझा यातायातले बिजुली बसको सुभारम्भ गरेको छ ।

साझाका संस्थापक अध्यक्ष विश्वबन्धु थापाले बिहान ११ बजे बिजुली बसको शुभारम्भ गर्नुभएको हो । शुभारम्भसँगै साझाका तीन वटा बिजुली बस दुई रुटमा चल्न थालेका छन् ।

रत्नपार्क, ठमेल नयाँ बसपार्क हुँदै एअरपोर्टको रुटमा दुई वटा बस चल्ने छ भने अर्को बस लगनखेल, रत्नपार्क हुँदै बूढानीलकण्ठ रुटमा चल्ने साझाका प्रमुख कार्यकारी अधिकृत महेन्द्र पाण्डेले जानकारी दिनुभयो ।

साझाका यी तीन वटै बसका चालक र परिचालकमा महिला छन् । बस अपाङ्गतामैत्री छ । अपाङ्गता भएकाहरुले  ह्वीलचियरसहित सजिलै यो बस चढ्न सक्नेछन् । सिटी बसको डिजाइनमा बनेको यो बस सेमी फ्लोर बस हो । यसमा ज्येष्ठ नागरिक, अशक्त र बालबालिका सजिलै चढ्न र ओर्लन सक्छन् ।

बसमा एक चालक र एक अपाङ्गता भएकाका लागि छुट्याइएकाे सिटसहित जम्मा २६ सिट रहेको छ । यस्तै, उभिएर यात्रा गर्न सजिलो होस् भन्नका लागि ह्याण्डल बार राखिएको छ । यस्तै, बसमा सीसीटीभी, टीभी, वाईफाई, डस्बिन र बस रोक्न विशेष खालको बटमको सुविधा रहेको साझाले जनाएको छ ।

बसमा १ सय ६१ दशमलव २८ किलो वाटको ब्याट्री प्रयोग गरिएको छ । बस ४५ किलोवाटको चार्जमा ५ घन्टा चार्ज गर्दा २ सय किलोमिटर गुड्न सक्ने साझाका प्रमुख कार्यकारी अधिकृत महेन्द्र पाण्डेले बताउनुभयो । उहाँकाअनुसार चीनबाट ल्याउन लागिएको ४० मध्ये अहिले तीन वटा बस मात्रै नेपाल आएका छन् ।

बाँकी ३७ वटा बस दशैँअघि नै आइपुग्ने उहाँले बताउनुभयो । एउटा बसको झन्डै डेढ करोड रुपैयाँ परेको पनि उहाँले जानकारी दिनुभयो । साझाले विद्युतीय बस खरिद गर्न गएको चैत १३ गते ग्लोबल टेन्डर आह्वान गरेको थियो।