अत्याधुनिक सेवा र सुविधा सहित अल इतिहाद रेल संचालनमा

फलेन्द्र मगर / दुबई

३०-जुन संयुक्त अरब इमिरेट्स (यूएई) ले आफ्नो सार्वजनिक यातायात इतिहासमा नयाँ अध्याय थप्दै ३० जुन २०२६ देखि अल इत्तिहाद रेल (Etihad Rail) को यात्रुवाहक सेवा औपचारिक रूपमा सञ्चालनमा ल्याएको छ। पहिलो चरणमा सेवा Abu Dhabi र Fujairah बीच सञ्चालन भएको हो, जसले करिब १ घण्टा ४५ मिनेटमै यात्रा पूरा गर्नेछ।  

यूएई सरकारको दीर्घकालीन राष्ट्रिय पूर्वाधार योजनाअन्तर्गत निर्माण गरिएको यो रेल सेवा देशभर सुरक्षित, द्रुत, आधुनिक र वातावरणमैत्री सार्वजनिक यातायात विस्तार गर्ने उद्देश्यले सुरु गरिएको हो। हाल टिकट बुकिङ खुला भइसकेको छ भने पहिलो चरणका धेरै यात्राहरूको टिकट छोटो समयमै बिक्री भएका छन्।  

अत्याधुनिक सुविधा

रेलमा यात्रुका लागि विश्वस्तरीय सुविधा उपलब्ध गराइएको छ, जसमा:

* आरामदायी तथा फराकिला सिट
* निःशुल्क Wi-Fi
* मोबाइल तथा ल्यापटप चार्जिङ पोइन्ट
* प्रशस्त सामान राख्ने व्यवस्था
* प्रिमियम तथा कम्फर्ट श्रेणी
* अपांगता भएका व्यक्तिमैत्री सुविधा
* स्टेशनमा क्याफे, रेस्टुरेन्ट तथा खुद्रा पसलहरू
* आधुनिक डिजिटल टिकटिङ प्रणाली रहेका छन्।  

टिकट र आगामी विस्तार

प्रारम्भिक अफरअन्तर्गत कम्फर्ट क्लासको टिकट ५५ दिरामबाट सुरु गरिएको छ भने प्रिमियम क्लासको टिकट १२० दिरामबाट उपलब्ध छ।  

रेल सेवा चरणबद्ध रूपमा विस्तार गरिनेछ। आगामी ३० सेप्टेम्बर २०२६ देखि Dubai र Al Dhaid स्टेशन सञ्चालनमा आउनेछन् भने त्यसपछि अन्य अमिरातहरू पनि राष्ट्रिय रेल सञ्जालमा जोडिने योजना रहेको छ। पूर्ण सञ्जाल सञ्चालनमा आएपछि यूएईका ११ प्रमुख शहर र क्षेत्र रेलमार्फत जोडिनेछन्।  

अल इत्तिहाद रेल सञ्चालनसँगै यूएईमा सडक यातायातको चाप घट्ने, यात्रुहरूलाई सुरक्षित तथा छिटो यात्रा सुविधा उपलब्ध हुने, पर्यटन प्रवर्द्धनमा टेवा पुग्ने तथा वातावरणीय प्रदूषण न्यूनीकरणमा समेत महत्वपूर्ण योगदान पुग्ने अपेक्षा गरिएको छ।