अखिल क्रान्तिकारीको अध्यक्षमा विजयप्रकाश सापकोटा र महासचिवमा रोशन थापा मगर विजयी

काठमाडौं । नेकपा (माओवादी केन्द्र) निकट विद्यार्थी संगठनको अखिल क्रान्तिकारीको अध्यक्षमा विजयप्रकाश सापकोटा निर्वाचित भएका छन् । आज (बुधबार) सम्पन्न भएको मतगणनामा सापकोटा ६८६ मतसहित निर्वाचित भएका छन् ।

उनलाई हेमन्त राईले कडा टक्कार दिएका थिए । सापकोटासँग पराजित राईले भने ६१५ मत ल्याएका छन् । उनीहरुबीच ७१ को मतान्तर छ । सापकोटा अध्यक्ष पुष्पकमल दाहालनिकट मानिन्छन् । राईलाई भने उपमहासचिव जनार्दन शर्माले साथ दिएको बताईन्छ ।

त्यस्तै महासचिवमा भने रोशन थापा मगर विजयी भएका छन् । अखिल क्रान्तिकारीको विधानअनुसार १ अध्यक्ष, खुला ४, समावेशी ५ गरी ९ उपाध्यक्ष, एक महासचिव, ९ उपमहासचिव, १२ सचिव र १ कोषाध्यक्ष हुने प्रावधान छ ।

नेतृत्व चयनका लागि शनिबार मतदान भएको थियो । अखिल क्रान्तिकारीले गत पुस १४ मा मतदान गराएर ३२ वर्षे उमेर हद लगाउनुपर्ने निर्णय गरेको थियो । त्यहीअनुसार केन्द्रीय समितिमा ३२ वर्ष उमेरमुनिका विद्यार्थीबीच प्रतिस्पर्धा भएको थियो ।

३३ पदाधिकारी, ४८ सचिवालय सदस्य, १६२ केन्द्रीय सदस्य र तीन केन्द्रीय निकायका पदाधिकारीका लागि माघ १२ गते निर्वाचन भएको थियो ।