ठूला दुई दलले थ्रेसोल्ड बढाएर साना दलहरुलाई निष्तेज पार्ने प्रयास गरे- प्रचण्ड

काठमाडौं ।   प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले कांग्रेस–एमालेले संविधान संशोधनमार्फत नागरिकको अधिकार खोस्न खोजे सडक संघर्ष गर्न बाध्य हुने चेतावनी दिएका छन् । संविधान संशोधन गरेर सत्तारुढ कांग्रेस–एमालेले जनताको अधिकार खोस्ने दुःस्साहस गरिरहेको उल्लेख गर्दै उनले त्यसलाई सफल हुन नदिने बताएका हुन् ।

पुष्पलाल स्मृति प्रतिष्ठानले शनिबार काठमाडौंमा आयोजना गरेको एक कार्यक्रममा अध्यक्ष दाहालले नेपाली जनतालाई थप अधिकार दिलाउन आफूहरुले संविधान संशोधन गर्न चाहेको स्पष्ट पार्दै जनताको अधिकार कटौती गर्ने आशयका साथ सत्तारुढ दलहरु आए त्यसविरुद्ध सडकमा पलेँटी कसेर संघर्ष गर्ने बताए ।

दुई वटा ठूला पार्टीले गर्न खोजेको संविधान संशोधन भनेको नेपाली जनताले प्राप्त गरेका अधिकारलाई पनि खोस्न खोज्ने, त्यसलाई उल्ट्याउने र देशलाई फेरि पहिलेकै निरंकुशतातिर लैजान चाहने खालको भएको जिकिर गर्दै उनले भने, “त्यस्ता खालका गतिविधि स्वीकार्य हुने छैन ।” अध्यक्ष दाहालले ठूला दुई दलले थ्रेसोल्ड बढाएर साना दलहरुलाई निष्तेज पार्ने प्रयास गरेको आरोप पनि लगाए । 

संविधान संशोधनको विरोधी आफूहरू नरहेको बताउँदै उनले संविधान सभाबाट बनेको संविधानले नेपालको सार्वभौमिकता, राष्ट्रियतालाई बाहेक अन्य सबै विषयलाई संशोधन गर्न मिल्ने व्यवस्था रहेको र अझै प्रगतिशील संविधान बनाउन यसलाई संशोधन गर्न सकिने बताए । ‘तर कसैको स्वार्थ सिद्ध गर्न यो संशोधन हुँदैन,’ उनले भने ।

‘अहिले थ्रेसहोल्डको कुरा आइरहेको छ । थ्रेसहोल्ड बढाएर साना पार्टीलाई निस्तेज पार्ने र तथाकथित दुई पार्टी सिस्टम ल्याएर पश्चिमा देशको जस्तो जबरजस्ती लान खोजिएको छ र त्यहीमार्फत देशलाई अधिनायकवादतर्फ लैजाने कोसिस भइरहेको छ,’ उनले भने ।