घरमै लिभरपुलको लज्जास्पद हार

पेरिस । यस सिजन लिभरपुलको खराव प्रदर्शनको एउटा अर्को नमुना देखिएको छ, जति बेला युरोपेली च्याम्पियन्स लिगको अन्तिम १६ को पहिलो लेगको खेलमा मंगलबार रियल म्याड्रिडले उसलाई ठूलो अन्तरले हरायो । गत सिजनको फाइनलमा रियलले लिभरपुललाई नै हराएर उपाधि जितेको थियो ।
एनफिल्डमा भएको खेलमा लिभरपुल ५–२ ले पराजित भएको हो र यसलाई लज्जास्पद हार भन्दा केही फरक पर्ने छैन् । यस हारपछि उसलाई अर्को चरण पुग्नका लागि रियलका घरमा यस्तै ठूलो अन्तरको जित आवश्यक हुनेछ । तर यो असम्भव देखिने जित हुनेछ, त्यो पनि रियलको घर बर्नाबाउमा ।
लिभरपुलले यसपल्ट सुरुमै दुई गोलको अग्रता लिएर पनि त्यसबाट फाइदा लिन सकेको थिएन् । डारविन नुनेज र मोहमद सलाहले एक एक गोल गरेपछि १४ मिनेटभित्र लिभरपुल दुई गोलले अगाडि रहेको थियो । त्यसपछि रियलका भिनिसियस जुनियर र करिम बेन्जेमाले ले दुई/दुई गोल गरे भने एडर मिलाटोले एक गोल थपे ।
मंगलबारकै अर्को खेलमा लयमा रहेको नेपोलीले दस खेलाडीमा सीमित रहेको इन्ट्राख्ट फ्रायन्कफर्टलाई उसकै घरमा २–० ले हरायो र अर्को चरण पुग्ने आफ्नो सम्भावनालाई बलियो बनायो । इटालीको सिरी ए मा उपाधितर्फ आरामले अग्रसर नेपोलीका लागि त्यसमा भिक्टर ओसिमहेन र जियोभानी डि लोरेन्जोले एक एक गोल गरे ।