अमेरिकामा कार दुर्घटना हुँदा दुई नेपालीको मृत्यु

काठमाडौं । अमेरिकाको भर्जिनियामा एउटा कार जमेको हिउँमा भिप्लिएर दुर्घटना भइ चिसो पोखरीमा खसेर डुब्दा २ नेपालीको मृत्यु भएको छ । फेयरफ्याक्स काउन्टी प्रहरीलाई उद्धृत गर्दै स्थानीय मिडिया एनबीसी वासिङ्टनले जनाएअनुसार दुर्घटना स्थानीय समयअनुसार बिहीबार बिहान साढे ७ बजे भएको हो ।

दुर्घटनामा ५५ वर्षका कर्ण खड्का र २० वर्षका निश्चल भट्टको मृत्यु भएको छ । स्थानीय प्रहरीका अनुसार कार जमेको हिउँमा चिप्लिएर आंशिक रुपमा चिसोले जमेको पोखरीमा डुबेको थियो । उद्धारकर्ता कारसम्म पुग्दा कार पानीमा १० फिट डुबेको र दुवै यात्रु मृत अवस्थामा रहेको प्रहरीले जनाएको छ ।

खड्काका सहकर्मीका अनुसार उनी विन्गेट बाइ विन्डम होटलमा काम गर्थे । सोही होटलको नजिकै सजावटको प्रयोजनको लागि बनाइएको सानो पोखरीमा कार डुबेको हो । निश्चल सोही होटलमा जागिरको लागि आवेदन दिन चाहन्थे त्यसैले उनी खड्काको साथमा गएका थिए ।

केही दिनयता हिमआँधीका कारण भर्जिनियासहित अमेरिकाका विभिन्न राज्यमा भारी हिमपात हुँदा जनजीवन कष्टकर छ।  आँधी र हिमपातकै कारण अमेरिकामा अहिलेसम्म ५ जनाको मृत्यु भइसकेको छ भने लाखौँ जना विस्थापित भएका छन्।