पोर्चुगलमा कन्सुलर सेवाः बाहिर खुलेआम रकम असुल्छन्, भित्र कर्मचारी आँखा चिम्लिन्छन्’

गणेश सापकोटा 

लन्डन । पोर्चुगलमा नेपाली राजदूतावास पेरिसले विगत केही दिनयता घुम्ती शिविर संचालन गरी कन्सुलर सेवा उपलब्ध गराउँदै आएको छ । राजदूतावासले पोर्चुगलस्थित महाबाणिज्य दूतावास बन्द गरिदिएपछि उत्पन्न समस्या समाधानका लागि राजदूतावास आफैंले कर्मचारी पठाएर सेवा दिएको हो । तर राजदूतावासबाट खटिएका कर्मचारी र गैर आवासीय नेपाली संघ पोर्चुगलका पदाधिकारीले खुलेआम सेवाग्राहीसँग अतिरिक्त रकम उठाउँदा आएका छन् । जसको पोर्चुगलबासीले चर्को विरोध गरेका छन् ।

कन्सुलर सेवा उपलब्ध गराइएको स्थानमा खटिएका संघका पदाधिकारी, संघकै अन्य कर्मचारीले कागजात प्रमाणीकरणका लागि आएका सेवाग्राहीसँग जनही २० युरो अतिरिक्त शुल्क लिइएको भेटिएको हो । पेरिसस्थित नेपाली राजदूतावासबाट खटिएकी सिता बस्नेत र दिपेन्द्र शाहले समेत अतिरिक्त शुल्क उठाउँदा चुप लागेर बसेको संघकै एक पदाधिकारीले बताए । उनका अनुसार कागजात प्रमाणीकरणका लागि ल्याउँदा सेवाग्राहीेले सुरुमा १० युरो र कागजात बुझिलिन आउँदा थप १० युरो अतिरिक्त शुल्क बुझाउँदै आएका छन् । जुन सरासर लुट हो ।

सेप्टेम्बर २० तारिख आइमामा अपोइन्टमेन्ट भएका बागलुङका किरण गर्बुजाले आफ्नो प्रहरी प्रतिवेदनमा छाप लगाउनका लागि २० युरो अतिरिक्त शुल्क बुझाएको बताए । ‘मैले मेरो लगायत ८ जनाको प्रहरी प्रतिवेदन एनआरएनए पोर्चुगलमा बुझाउँदा राजस्व बाहेक प्रतिव्यक्ति १० यूरोको दरले कुल ८० युरो बुझाएँ । फेरी त्यही कागजात बुझिलिन जाँदा थप ८० युरो अतिरिक्त शुल्क बुझाएँ ।’ उनले भने, ‘नेपाली राजदूतावास पेरीस र एनआरएनए पोर्चुगलको यो कस्तो खालको सेवा हो । आखिर यो लुट किन ?’ गर्बुजामात्रै होइन् चितवन भण्डाराका पवित्रा राना मगरले पनि यस्तै गुनासो पोखिन् । ‘एनआरएनएको ढोकामा बस्ने दाइहरुले कागजात खोज्नुपर्ने भएकोले पैसा दिएमात्रै खोजेर ल्याइदिने भनेपछि मैले १० युरो थमाइदिएँ अनि बल्ल एक घण्टापछि कागजात पाएँ ।’ यो त प्रतिनिधी पात्रमात्रै हुन् । कन्सुलर शिविरमा आउने अधिकांश सेवाग्राही यही समस्याबाट ग्रस्त भएका छन् । सरकारी कर्मचारीको आडमा एनआरएनए पोर्चुगलका पदाधिकारीले गरेको हर्कतले पोर्चुगलका संघ संस्थासमेत आजित बनेका छन् ।

अनाधिकृत रुपमा सेवाग्राहीसँग अतिरिक्त शुल्क लिएकोबारे एनआरएनए पोर्चुगलका अध्यक्ष उमेश कुमार खड्कासँग बुझ्दा उनले नेपाली राजदूतावास पेरिससँग समन्वय गरेर लिएको बताए । तर यसप्रति राजदुतावासकी कर्मचारी सिता वस्नेतले भने यसबारे आफुलाई केही थाहा नभएको बताइन् । तर बस्नेतले एनआरएनएका कर्मचारीले खुलेआम सेवाग्राहीसँग रकम असुल्दा कानमा तेल हालेर बसेको आरोप नेपाली समुदायले लगाएका छन् । यसअघि महाबाणिज्य दूतावासले प्रति कागजात ९ युरोमा प्रमाणिकरण तथा अनुवाद गर्दै आएको थियो । तर नेपाली राजदूतावास पेरीसले महाबाणिज्य दूतावास बन्द गराएर पोर्चुगलका नेपाली समुदायलाई दुःख दिएको यहाँस्थित नेपालीहरुको भनाई छ ।