हामी आयोग बनाएर काम थाल्छौँ, तर अरू सरकार आएपछि त्यो प्रक्रिया नै भत्काइन्छ- अध्यक्ष ओली

काठमाडौं- नेकपा एमालेका अध्यक्ष केपी शर्मा ओली अहिले मतदाता भेटघाटमा व्यस्त छन् । उनी अहिले झापा क्षेत्र नम्बर ५ को कमल गाउँपालिका‍-५ का बासिन्दा भेट्न पुगेका छन् । ओलीलाई फूल, मालासहितले स्वागत गरिएको छ। उनलाई स्थानीय दुर्गा अधिकारीसहितले स्वागत गरे। आफ्‌नै सामुन्नेमा ओली आइपुग्दा भावुक देखिएकी उनले अध्यक्ष ओली गुनासो सुनाइन् ।

‘त्यो भ्युटावर, सिंहदरबार, सरकारी कार्यालय जल्दा त मेरो हृदयबाटै धुँवा उठ्यो’, उनले भनिन्, ‘ती भवन र कार्यालयको के दोष थियो र जलाइयो ? ती विध्वङ्स गर्नेलाई अब त्यसै छाड्नू ? उनको कुरा सुनेर केहीबेर ओली मौन रहे । ‘सबै कुरा समय आएपछि ठिक हुन्छ, चिन्ता नगर्नु होला’, उनले भने । स्वामीचोक पुग्दा अधिकारीसँगै अन्य स्थानीयले पनि देशका सम्पदा जलाउनेलाई कारबाहीको दायरामा ल्याउनु पर्ने बताए ।

रतुवा नदीको तटबन्धन, गाउँगाउँमा कालोपत्रे बाटो, बिजुली र खानेपानी घरघरसम्म ल्याउने मान्छेलाई कसैले भुल्न नसक्ने स्थानीय राम धिमालले बताए । यो ठाउँको विकास गरेको र अब पनि अरू विकास गर्ने नेतालाई नै यहाँका बासिन्दाले छान्ने उनको भनाइ थियो ।

आइतबार अध्यक्ष ओली कमल गाउँपालिकाका विभिन्न टोलहरूमा पुगेर मतदातासँग भेट गरिरहेका छन् । शनिबारसमेत उहाँले यही गाउँपालिकाका विभिन्न टोलमा पुगेर स्थानीयसँग उनले भेटघाट गरे । कमल गाउँपालिकामा बसोबास गर्दै आएका भूमिहीन परिवारहरूले आफ्ना दीर्घकालीन समस्या समाधानका लागि नेकपा (एमाले) र त्यसको नेतृत्वको विकल्प नरहेको बताएका छन्।

उनीहरूले एमाले अध्यक्ष तथा पूर्वप्रधानमन्त्री ओलीसँग भेट गर्दै आगामी निर्वाचनमा पुनः विजयी भई आफूहरूलाई जग्गाको धनीपुर्जा दिलाइदिन आग्रह गरेका छन्। कमल गाउँपालिकाका विभिन्न बस्तीमा आयोजित भेटघाटका क्रममा भूमिहीन परिवारहरूले भूमिसम्बन्धी समस्या समाधानमा एमाले नेतृत्वले देखाएको पहल स्मरण गर्दै निरन्तरता आवश्यक रहेको धारणा राखेका हुन् । स्थानीय भन्छन्,‘आयोग गठनदेखि नीतिगत निर्णयसम्मको स्पष्ट इच्छाशक्ति एमालेले मात्र देखाएको छ।’

भेटका क्रममा अध्यक्ष ओलीले एमाले नेतृत्वको सरकारले भूमिहीन, सुकुम्बासी तथा अव्यवस्थित बसोबासी समस्या समाधानका लागि आयोग गठन गरी काम सुरु गरे पनि सरकार परिवर्तनसँगै ती प्रयासहरू अवरुद्ध हुने गरेको उल्लेख गरे।

‘हामी आयोग बनाएर काम थाल्छौँ, तर अरू सरकार आएपछि त्यो प्रक्रिया नै भत्काइन्छ,’ उनले भने, ‘अन्ततः काम त एमालेले नै गर्नुपर्ने हुन्छ।’ आगामी प्रतिनिधिसभा निर्वाचनका लागि झापा क्षेत्र नम्बर ५ का उम्मेदवारसमेत रहेका अध्यक्ष ओलीले स्थानीयसँग प्रत्यक्ष संवाद गर्दै विकास, बसोबास र रोजगारीका सवालमा एमालेको प्रतिबद्धता गरे।

स्थानीयबासीहरूले एमाले र ओलीकै नेतृत्वमा गाउँको मुहार फेरिने गरी विकासका योजना अघि बढेको उल्लेख गर्दै अधुरा योजनाहरू पूरा गर्न फेरि पनि निर्वाचनमा एमालेकै पक्षमा उभिने प्रतिबद्धता जनाएका छन्। उनीहरूले एमाले र अध्यक्ष ओलीको विकल्प नभएको निष्कर्षसमेत सुनाएका थिए।