सुनामीको चेतावनीपछि जापानका १९ लाखभन्दा बढीलाई घर छोडेर सुरक्षित स्थानमा जान आग्रह

काठमाडौँ । रुसमा आएको शक्तिशाली भूकम्पपछि आएको सुनामीको कारण जापानका १९ लाखभन्दा बढी मानिसहरूलाई आफ्नो घर छोड्न भनिएको छ । यी मध्ये लगभग १० हजार ५०० मानिसहरू होक्काइडोमा छन्, जहाँ स्थानीय मिडिया फुटेजमा मानिसहरू घरको छतमा चढेको देखिएको छ ।

केही मानिसहरू टोकियोको दक्षिणमा रहेको चिबा तटमा भेला भएका छन् । अधिकारीहरूले मानिसहरूलाई जापानको उत्तरी तटीय क्षेत्र खाली गर्न र उचाईमा सर्न अपील गरेका छन् । जापानको प्रशान्त तटमा दर्जनौं सुनामी छालहरू आइपुगेका छन् । प्रशान्त तट बाहेक, उत्तरमा होक्काइडोदेखि दक्षिणमा वाकायामा प्रान्तसम्म निकासी चेतावनी जारी गरिएको छ ।

मौसम विज्ञान एजेन्सीले सुनामी छालहरू ३ मिटरसम्म अग्लो हुन सक्ने बताएको छ । जापानको टोकियो इलेक्ट्रिक पावर कम्पनीले फुकुशिमा दाइची र फुकुशिमा दाइनी आणविक प्लान्टका कामदारहरूलाई अग्लो जमिनमा सारिएको बताएको छ ।