बल प्रयोगले समस्या हल हुँदैन, सरकारले संवाद र सहमति जुटाओस्: प्रचण्ड

नेपाली कम्युनिस्ट पार्टी (नेकपा) का संयोजक पुष्पकमल दाहाल 'प्रचण्ड' ले सुनसरी घटना र पछिल्लो राजनीतिक घटनाक्रमलाई लिएर सबै दल तथा सरकारलाई संयमता अपनाउँदै सामाजिक सद्भाव कायम राख्न अपिल गर्नुभएको छ। सिंहदरबारस्थित सार्वजनिक लेखा समितिको हलमा आयोजित सर्वदलीय बैठकमा बोल्दै पूर्वप्रधानमन्त्री प्रचण्डले अहिलेको समय राजनीतिक तिक्तता बढाउने नभई राष्ट्रिय जिम्मेवारी प्रदर्शन गर्ने भएको बताउनुभएको हो। सत्ता नेतृत्वकर्ता दल राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा सुनसरी घटनालगायत समसामयिक विषयमा छलफल गर्न उक्त बैठक बोलाइएको थियो।

बैठकमा आफ्नो धारणा राख्दै प्रचण्डले भन्नुभयो, "यो राजनीतिक तिक्तता बढाउने समय होइन, राष्ट्रिय जिम्मेवारी प्रदर्शन गर्ने समय हो। सबै राजनीतिक दल, सरकार र सरोकारवाला पक्षले सामाजिक सद्‌भाव, शान्ति र आपसी विश्वासलाई केन्द्रमा राखेर एकजुट रूपमा अघि बढ्नुपर्छ। यही नै अहिलेको राष्ट्रिय आवश्यकता हो।"  

प्रचण्डले राख्नुभएका मुख्य विषयहरू:

• सामाजिक सद्भाव र संयमता: सुनसरीमा सिर्जित तनावप्रति गम्भीर चिन्ता व्यक्त गर्दै उहाँले विगतका विपद् र संविधान निर्माणका क्रममा जस्तै राजनीतिक परिपक्वता, संवाद र जिम्मेवारी देखाउन आग्रह गर्नुभयो।

• सरकारको भूमिकामाथि प्रश्न: यस्ता संवेदनशील विषयमा रास्वपा नेतृत्वको सरकारले साझा समाधान खोज्न नसकेको भन्दै उहाँले असन्तुष्टि जनाउनुभयो। प्रधानमन्त्रीले तत्काल सबै दललाई विश्वासमा लिएर सर्वदलीय संवाद र सहमतिको पहल गर्नुपर्ने उहाँको भनाइ थियो।

• संवादबाटै समाधान: बल प्रयोगले कुनै पनि समस्याको दीर्घकालीन समाधान ननिस्कने उल्लेख गर्दै संवाद र समझदारीबाटै परिस्थितिलाई सहज बनाउन सकिनेमा उहाँले जोड दिनुभयो।

• घुसपैठप्रति सतर्कता: घटनास्थलमा स्थानीय बाहेक बाहिरी तत्त्वहरूले समेत वातावरण भड्काउन सक्ने भएकाले सबै पक्षलाई उच्च सतर्क रहन आग्रह गर्नुभयो।

नेपाली कम्युनिस्ट पार्टीले यस विषयमा आफ्नो आधिकारिक धारणा सार्वजनिक गरिसकेको र स्थानीय तहमा शान्ति तथा सद्भाव कायम राख्न पार्टी पंक्तिलाई निर्देशन दिइसकिएको पनि प्रचण्डले जानकारी दिनुभयो।

उक्त सर्वदलीय बैठकमा नेपाली कांग्रेसका सभापति गगन थापा, संसदीय दलका नेता भीष्मराज आङ्देम्बे, नेकपा एमालेका महासचिव शंकर पोखरेल, जनमत पार्टीका अध्यक्ष सीके राउत, राप्रपा अध्यक्ष राजेन्द्र लिङदेन र सांसद खुस्बु ओलीलगायतका नेताहरूको सहभागिता रहेको थियो।