सोमबार टुँडिखेलमा ओली–देउवाविरुद्ध नाराबाजी गर्ने दुईजना पक्राउ

काठमाडौं ।  प्रधानमन्त्री एवं नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवाविरुद्ध नाराबाजी गरेको आरोपमा दुईजना पक्राउ परेका छन् ।

जिल्ला प्रहरी परिसर काठमाडौंले उनीहरूलाई मंगलबार पक्राउ गरेको हो । सुर्खेतका गोपीराज जैशी र अछामका रामबहादुर बुढालाई नियन्त्रणमा लिएर सोधपुछ भइरहेको काठमाडौं परिसरका एक अधिकारीले जानकारी दिए । उनीहरूलाई अभद्र व्यवहार वा सार्वजनिक अपराध ऐनअन्तर्गत मुद्दा चलाउने काठमाडौं प्रशासनको तयारी भएको बझिएको छ ।

 सोमबार टुँडिखेलमा धेरै मानिस गौरा पर्व मनाउन र खेल्न आएका थिए । तर, केही व्यक्तिले होहल्ला गरेपछि ओली र देउवाले भाषण गरेनन् । कार्यक्रम बिथोल्न खोजेको भन्दै पछि प्रशासनले केही व्यक्तिलाई नियन्त्रणमा लिएको हो ।