महाधिवेशन समयमै हुनु पार्टीको वैधानिक, नैतिक र राजनीतिक आवश्यकता हो: महामन्त्रीका उम्मेदवार नैनसिंह महर

काठमाडौं- नेपाली कांग्रेसका प्रभावशाली युवा नेता तथा १५औं महाधिवेशनमा महामन्त्री पदका सशक्त उम्मेदवार श्री नैनसिंह महरले पार्टीको महाधिवेशन कुनै पनि बहानामा सार्न नहुने बताउनुभएको छ। उहाँले तोकिएकै मितिमा महाधिवेशन सम्पन्न गर्नु पार्टीको वैधानिक, नैतिक र राजनीतिक आवश्यकता भएको स्पष्ट पार्नुभयो। महाधिवेशनको मिति नजिकिँदै गर्दा नेतृत्व तहबाटै विभिन्न कोणबाट मिति सार्न सकिने चर्चा चलिरहेका बेला, महरले समयमै हुने महाधिवेशनले मात्र पार्टीलाई पुनर्जीवन दिन सक्ने तर्क प्रस्तुत गर्नुभएको हो।

काठमाडौंको बानेश्वरमा पार्टीका अगुवा कार्यकर्तासँग आज भएको विशेष अन्तर्क्रियामा बोल्दै नेता महरले भन्नुभयो, "नेपाली कांग्रेस जस्तो लोकतान्त्रिक पार्टीका लागि आवधिक महाधिवेशन लोकतान्त्रिक जीवन्तताको आधारस्तम्भ हो। यो केवल नेतृत्व चयनको प्रक्रिया मात्र नभई पार्टीको नीति, विचार र आगामी कार्यदिशा तय गर्ने सर्वोच्च थलो पनि हो। विधानले निर्दिष्ट गरेको मितिमा महाधिवेशन सम्पन्न गर्नु वर्तमान नेतृत्वको पहिलो र अनिवार्य दायित्व हो र त्यसका लागि तयारी थाल्नुपर्छ। "

उहाँले महाधिवेशन समयमै नगर्दा पार्टी पंक्तिमा गम्भीर निराशा छाउने र यसले सांगठनिक गतिहीनता निम्त्याउने चेतावनी दिनुभयो। "कुनै पनि प्राविधिक वा राजनीतिक बहानामा महाधिवेशन पछि धकेल्ने प्रयास गरिनु दुर्भाग्यपूर्ण हुनेछ। यसले पार्टीको आन्तरिक लोकतन्त्रमाथि नै प्रश्न उठाउँछ र कार्यकर्ताको पार्टीप्रतिको विश्वास कमजोर बनाउँछ," महरले थप्नुभयो, "समयमै हुने महाधिवेशनले मात्र पार्टीभित्र नयाँ ऊर्जा र विचारको प्रवाह सुनिश्चित गर्छ, नेतृत्व हस्तान्तरणको स्वाभाविक प्रक्रियालाई अघि बढाउँछ र गुटबन्दीलाई निरुत्साहित गर्दै एकताको सन्देश दिन्छ।"

नेता महरले आगामी स्थानीय, प्रदेश र संघीय निर्वाचनको तयारीका लागि पनि पार्टीको महाधिवेशन समयमै सम्पन्न हुनु अत्यावश्यक रहेको बताउनुभयो। "एकताबद्ध, ऊर्जावान र वैचारिक रूपमा स्पष्ट कांग्रेसले मात्रै आगामी चुनावमा सफलता हासिल गर्न सक्छ। यसका लागि महाधिवेशनबाट अनुमोदित नयाँ नेतृत्व र कार्यदिशा अनिवार्य छ," उहाँले निष्कर्ष निकाल्नुभयो। नेता महरको यो दृढ अडानले नेपाली कांग्रेसभित्र महाधिवेशनको मिति र प्रक्रियाबारे भइरहेको बहसमा नयाँ तरंग सिर्जना गरेको छ र समयमै महाधिवेशन हुनुपर्छ भन्ने पक्षमा थप दबाब बढाएको छ।