काभा भलिबल: सेमिफाइनल यात्रा जीवितै राख्न नेपाल आज बङ्गलादेशसँग भिड्दै, पहिलो जितको खोजी

काठमाडौँ। पाकिस्तानको इस्लामावादमा जारी सेन्ट्रल एसियन भलिबल एसोसिएसन (काभा) पुरुष भलिबल च्याम्पियनसिप २०२६ मा नेपालले आज (आइतबार) आफ्नो चौथो खेलमा बङ्गलादेशको सामना गर्दैछ। इस्लामावादस्थित गारिसन जिन्नाह स्पोर्ट्स कम्प्लेक्समा हुने यो खेल नेपाली समय अनुसार दिउँसो १:४५ बजे सुरु हुनेछ।

प्रतियोगितामा सेमिफाइनलको सम्भावना जीवितै राख्न नेपालका लागि आजको खेल जित्नैपर्ने दबाब छ। लगातार तीन खेलमा पराजय भोगेको नेपाली टोली पहिलो जितको खोजीमा कोर्टमा उत्रिनेछ।

खेलको पृष्ठभूमि र अंक तालिकाको अवस्था:

• नेपालको प्रदर्शन: नेपाल यसअघि खेलेका तीनवटै खेलमा पराजित भएको छ। पहिलो खेलमा कजाखस्तान र दोस्रो खेलमा श्रीलङ्कासँग ३–२ को प्रतिष्पर्धात्मक सेटमा पराजित भएको नेपालले समान १–१ अङ्क पाएको थियो। तेस्रो खेलमा भने नेपाल घरेलु टोली पाकिस्तानसँग ३–० को सोझो सेटमा स्तब्ध बन्यो। हाल नेपाल ३ खेलबाट २ अङ्क जोड्दै तालिकाको पुछारमा छ। 
• बङ्गलादेशको अवस्था: बङ्गलादेश बलियो स्थितिमा छ। उसले ३ खेलमध्ये २ खेल (उज्बेकिस्तान र कजाखस्तान विरुद्ध) मा जित र १ खेल (पाकिस्तान विरुद्ध) मा हार बेहोर्दै ४ अङ्कका साथ तालिकाको तेस्रो स्थानमा रहेको छ। 
• सेमिफाइनल समीकरण: प्रतियोगितामा नेपाल, पाकिस्तान, कजाखस्तान, उज्बेकिस्तान, श्रीलङ्का र बङ्गलादेश गरी ६ राष्ट्र सहभागी छन्। सिङ्गल राउन्ड रोबिन लिग सकिएपछि शीर्ष चार टोली सेमिफाइनलमा प्रवेश गर्नेछन्। जितविहीन रहेको नेपालका लागि आज हार बेहोरेमा प्रतियोगिताको यात्रा लिग चरणमै सकिने जोखिम रहनेछ। 

नेपालले लिग चरणको आफ्नो अन्तिम खेल सोमबार उज्वेकिस्तानसँग खेल्ने तालिका छ l 

पाकिस्तानको इस्लामावादमा जारी काभा (CAVA) पुरुष भलिबल च्याम्पियनसिप २०२६ का लागि नेपाल भलिबल संघले हरिहजुर थापाको कप्तानीमा १२ सदस्यीय राष्ट्रिय टोली घोषणा गरी पाकिस्तान पठाएको छ।भलिबल खेलमा मुख्य ६ जना खेलाडी कोर्टमा (प्लेइङ सेट) उत्रिने गर्दछन् भने बाँकी वैकल्पिक खेलाडीका रूपमा रहन्छन्। नेपाली टोलीको पूर्ण विवरण निम्न अनुसार छ l 

कप्तान र मुख्य प्रशिक्षक:

• कप्तान: हरिहजुर थापा (सेटर)
• मुख्य प्रशिक्षक: जगदिश भट्ट
• सहायक प्रशिक्षक: रुपेशकुमार विष्ट 

नेपाली टोलीका १२ खेलाडीहरू (प्लेइङ सेट र वैकल्पिक):

यसपटक टोलीमा अनुभवी खेलाडीहरूसँगै ६ जना नयाँ खेलाडीहरूले डेब्यु गरेका छन्। प्रशिक्षक जगदीश भट्टले खेलको रणनीति र प्रतिद्वन्द्वी टोली (बङ्गलादेश) को शक्ति हेरेर यी १२ खेलाडीमध्येबाट मुख्य ६ जना (प्लेइङ सेट) र १ जना लिबेरो चयन गरी कोर्टमा उतार्नेछन्: 

1. हरिहजुर थापा (कप्तान)
2. सुनिल बोहरा
3. पहल गहतराज
4. सन्तोष विक
5. सरोज वर्देवा
6. राजेन्द्र धामी
7. सुरज चुनारा
8. नृपध्वज बस्नेत
9. रविन नगरकोटी
10. हिमाल सुनारी
11. दिपेश कुँवर
12. विनोदबहादुर चन्द