आदिवासी जनजाति महासंघ, युएईले एक पीडित परिवारको उद्धार गरी स्वदेश फर्कायो

फलेन्द्र बलम्पाकी मगर / युएई

युएई, जुन २६ – लामो समयदेखि रोजगारी गुमाएर युएईमा गैरकानुनी रूपमा बस्न बाध्य भएका खोटाङ जिल्ला, नागी गाउँपालिका–३ का स्थायी बासिन्दा कृष्णभक्त राई, उनकी श्रीमती र छोरालाई नेपाल आदिवासी जनजाति महासंघ, युएईको विशेष पहलमा उद्धार गरी स्वदेश फर्काइएको छ।

महासंघको उद्धार तथा राहत कोषको आर्थिक सहयोगमा परिवारको आवश्यक कानुनी तथा कागजी प्रक्रिया पूरा गरी सुरक्षित रूपमा नेपाल पठाइएको महासंघले जनाएको छ।

महासंघका अध्यक्ष भागरथी कुमार भगतका अनुसार उद्धार प्रक्रियामा आवश्यक कानुनी तथा प्रशासनिक सहजीकरणका लागि नेपाली राजदूतावास, अबुधाबी तथा नेपाली समाज युएईका पदाधिकारीहरूले जटिल परिस्थितिका बाबजुद दिनरात खटेर महत्वपूर्ण भूमिका निर्वाह गरेका थिए। सबै पक्षको समन्वय र सहयोगका कारण उद्धार कार्य सफलतापूर्वक सम्पन्न भएको उनले बताए।

अध्यक्ष भगतले नेपाल आदिवासी जनजाति महासंघ, युएई पहिचान, भाषा, कला र संस्कृतिको संरक्षण तथा प्रवर्द्धनमा मात्र सीमित नभई आवश्यक पर्दा मानवीय सेवामा पनि अग्रसर रहने संस्थाको रूपमा स्थापित भएको उल्लेख गरे।

उद्धार अभियान सफल बनाउन प्रत्यक्ष तथा अप्रत्यक्ष रूपमा आर्थिक, भौतिक र मानवीय सहयोग गर्ने विभिन्न संघसंस्था, सहयोगी तथा व्यक्तिहरूप्रति अध्यक्ष भगतले हार्दिक धन्यवाद ज्ञापन गरेका छन्। साथै, महासंघअन्तर्गतको उद्धार तथा राहत कोषका पदाधिकारी तथा स्वयंसेवकहरूको समर्पण र सक्रिय योगदानप्रति विशेष आभार व्यक्त गरेका छन्।