गभर्नर सिफारिस समितिका सदस्य तथा पूर्व गभर्नर भट्टराईले असन्तुष्टी जनाउँदै दिए राजीनामा

काठमाडौं। नेपाल राष्ट्र बैंकका लागि गभर्नर छनोट थप पेचिलो बन्दै गएको छ। गभर्नर सिफारिस समितिका सदस्य तथा पूर्व गभर्नर विजयनाथ भट्टराईले असन्तुष्टी जनाउँदै आज राजीनामा दिएका छन्।

मन्त्रिपरिषद्ले गत चैत ११ गते उपप्रधान एवं अर्थमन्त्री विष्णु पौडेलको संयोजकत्वमा गठन गरेको सिफारिस समितिमा पूर्व गभर्नरका रूपमा भट्टराईसहित विश्व पौडेल सदस्यको जिम्मेवारीमा थिए।

एक महिनासम्म एउटा बैठकसमेत बस्न नसकेको भन्दै उनले राजीनामा दिएको बताएका छन्। समितिको भूमिकालाई नजरअन्दाज गरिएको भन्दै उनले असन्तुष्टी जाहेर गरिरहेको अवस्थामा उनको राजीनामा आएको हो। राष्ट्र बैंकमा चैत २४ गतेदेखि गभर्नर पद रिक्त छ। डेपुटी गभर्नर निलम तिम्सिना नै कायममुकायम गभर्नरको जिम्मेवारीमा छिन्।