तत्काल संसद् बैठक नबोलाए विशेष अधिवेशन माग गर्ने विपक्षी गठबन्धनको चेतावनी

काठमाडौं । प्रमुख प्रतिपक्षी दल नेकपा माओवादी केन्द्रसहितका सात राजनीतिक दलले तत्काल संसद बैठक बोलाउन माग गरेका छन् ।

संसद्मा प्रतिनिधित्व गर्ने विभिन्न ७ दलको तर्फबाट आयोजित संयुक्त पत्रकार सम्मेलनलाई सम्बोधन गर्दै माओवादी केन्द्रका अध्यक्ष पुष्पकमल दाहाल प्रचण्डले तत्काल सदन बोलाउन माग गरेका हुन् । तत्काल संसद् बैठक नबोलाए विशेष अधिवेशन माग गर्ने उनको चेतावनी दिएका छन।

‘हामी विपक्षी दलहरू संसद्को मर्यादा र गरिमाको सम्मान गर्दै तत्काल संसद्को हिउँदे अधिवेशनको माग गर्छौं,’ प्रचण्डले भने ।

विपक्षी सात दलले सरकार स्वेच्छाचरीढंगबाट चलेको आरोप पनि लगाएका छन् । ‘सरकारले तत्काल अधिवेशन प्रक्रिया थालनी नगरे विशेष अधिवेशनको माग गर्ने जानकारी दिँदै स्वेच्छाकारी र जनविरोधी काम जारी राखे कडा संघर्षमा उत्रने चेतावनी समेत दिन चाहन्छौं,’ विपक्षी दलहरूले जारी गरेको ६ बुँदे वक्तव्यमा भनिएको छ ।

दाहालले वर्तमान सत्ता गठबन्धनले सरकार चलाउने नैतिक आधार गुमाइसकेको बताएका छन्। संसद्‍मा प्रतिनिधित्व सात दलको तर्फबाट आयोजित संयुक्त पत्रकार सम्मेलनलाई सम्बोधन गर्दै प्रचण्डले प्रधानमन्त्री केपी शर्मा ओलीको राजीनामा मागेका हुन्।

आफूहरूले सरकार ढाल्ने भनेर कतै अभिव्यक्ति नदिएको उनको भनाइ छ। सरकारका गलत क्रियाकलापको निरन्तर प्रतिवाद भने गरिरहने उनले बताए।

वर्तमान सरकारले सत्तामा बसिरहने आधार गुमाएको निष्कर्ष विपक्षी सात दलको निष्कर्श रहेको प्रचण्डले सुनाए।

‘गठबन्धन गर्दा घोषणा गरेका काम कुनै अगाडि बढेका छैनन्। संविधान संशोधन त प्रधानमन्त्री आफैँले २०८७ सालमा भनिसकेपछि र अन्य सुशासनकाबारे भनिएका कुरा ठीक उल्टो गतिविधि गरिसकेपछि नैतिकरूपले सरकारमा बसिराख्ने आधार गुमाएको छ। नैतिकताको आधारमा भन्ने हो भने राजीनामा दिनु नै उचित हुन्छ,’ उनले भने।

विपक्षी ७ दलीय गठबन्धनले सरकारविरुद्ध ६ बुँदे सयुक्त वक्तव्य जारी गरेका छन् । जारी वक्तव्यमा आजपाका सहअध्यक्ष तिलक थापा मगर, नेपाल समाजवादी पार्टीका अध्यक्ष महिन्द्र राय यादव, राप्रपाका अध्यक्ष राजेन्द्र लिङ्देन, रास्वपाका कार्यवाहक सभापति डिपी अर्याल, नेकपा एकीकृत समाजवादीका अध्यक्ष माधवकुमार नेपाल, राष्ट्रिय जनमोर्चाकी उपाध्यक्ष दुर्गा पौडेल र नेकपा माओवादी केन्द्रका अध्यक्ष पुष्पकमल दाहालले हस्ताक्षर गरेका छन् ।