अधिवेशनपछि आन्तरिक एकतालाई थप बलियो हुन्छ: अध्यक्ष नेपाल

काठमाडौँ ३२ जेठः नेपाल कम्युनिष्ट पार्टी (एकीकृत समाजवादी)का अध्यक्ष माधवकुमार नेपालले बिद्रोहपछि हुन लागेको पार्टीको ऐतिहासिक राष्ट्रिय अधिवेशन सफल बनाउन सबै कमिटीलाई निर्देशन दिनुभएको छ । अध्यक्ष नेपालले अन्तर पार्टी निर्देशन (अपानी) जारी गर्दै निर्धारित समयमा अधिवेशन सम्पन्न गरी पार्टीको आन्तरिक एकतालाई थप बलियो बनाउनुपर्नेमा जोड दिनुभयो ।

    उहाँले कम्युनिष्ट आन्दोलनले स्थापनाकालदेखि नै अङ्गिकार गरेका मुलुकको राष्ट्रियता, जनताको जनजीविका, स्वतन्त्रता, लोकतन्त्र जस्ता विषयमा थप छलफल गरी सही कार्यदिशा भएको बलियो कम्युनिष्ट पार्टी निर्माणमा अधिवेशनले सहयोग पुर्‍याउनेमा विश्वास व्यक्त गर्नुभयो ।

    अध्यक्ष नेपालले विधि र पद्धतिमा आधारित बलियो कम्युनिष्ट पार्टी निर्माण गरी कम्युनिष्ट आन्दोलनलाई एकतातर्फ अघि बढाउनुपर्ने विचार व्यक्त गर्नुभयो । पार्टीको आगामी असार १६ देखि २० गतेसम्म आसन्न महाधिवेशनमा प्रतिनिधि छनोटका लागि निर्देशिका तयार गरिएको छ ।

    प्रतिनिधि बन्नका लागि कम्तीमा तीन वर्ष पार्टी सदस्य भएको हुनुपर्ने भनिएको अपानीमा पार्टी निकट कमिटी तथा जनवर्गीय सङ्गठनबाट प्रतिनिधिको सङ्ख्या निर्धारण गरिएको छ ।