‘गरिबको चमेली बोलिदिने कोही छ?’ भन्दै सरकारलाई विश्वप्रकाशको सहकार्यको प्रस्ताव

काठमाडौं । नेपाली कांग्रेसका उपसभापति विश्वप्रकाश शर्माले नयाँ राजनीतिक शक्ति र सरकारप्रतिको नागरिक विश्वास क्रमशः खण्डित हुँदै गएको भन्दै गम्भीर चिन्ता व्यक्त गरेका छन्। समाजमा बढ्दो निराशा र नागरिकमा घट्दो आशाको कारण खोज्न उनले सरकारसँग आग्रह गरेका छन्।

सामाजिक सञ्जालमा एक भिडियो सन्देश जारी गर्दै उपसभापति शर्माले विगतमा प्रेम आचार्यले गरेको आत्मदाह र हालै गणेश नेपालीले आत्मदाह गर्ने परिस्थिति सिर्जना हुनुले समाजको भयावह अवस्थालाई चित्रण गरेको उल्लेख गरे। ‘समाजमा यो प्रकारको निराशा किन व्याप्त हुँदैछ? मानिसमा किन आशा मर्दैछ?’ भन्दै उनले प्रश्न गरे, ‘हामी पुराना राजनीतिक दलप्रतिको विश्वास त टुट्यो नै, तर नयाँ राजनीतिक शक्ति र सरकारप्रतिको विश्वास पनि किन यसरी क्रमशः खण्डित हुँदैछ? यसको जवाफ खोज्ने बेला आएको छ।’

 उपसभापति शर्माले वर्षायामको यस्तो कष्टकर समयमा सुकुम्बासीहरूलाई विस्थापित गराएको भन्दै काठमाडौंका महानगर प्रमुख (मेयर) बालेन्द्र शाह (बालेन) को कदमप्रति असन्तुष्टि जनाए। आफ्नै देश भित्र शरणार्थी जस्तै बनेका सुकुम्बासीहरूले अहिले झन् कष्टकर जीवन बिताउनु परिरहेको भन्दै उनले भने, ‘"गरिबको चमेली बोल्दिने कोही छ" भनेर प्रधानमन्त्री बालेन्द्र शाहले नागरिकमा आशा र विश्वास जगाउनुपर्ने थियो, तर व्यवहारमा त्यस्तो देखिएन।’

 आफ्नो प्रश्न प्रतिपक्षीय राजनीतिक पूर्वाग्रह मात्र नभई समाजमा सकारात्मक आशा जगाउने प्रयास भएको शर्माले स्पष्ट पारेका छन्। संकटको यो घडीमा सरकारलाई प्रश्नले घेर्न वा आलोचना मात्र गर्न नचाहेको भन्दै उनले रचनात्मक सहकार्यका लागि कांग्रेस तयार रहेको बताए।

‘यस्तो बेलामा हामी सरकारलाई घेर्न वा आलोचना मात्र गर्न चाहँदैनौँ। हामी सरकारसँग सहकार्य गर्न तयार छौँ,’ शर्माले थपे, ‘सरकारको साथमा उभिन, साथ दिन र संकट समाधानका लागि हामी आफ्नो हात अगाडि बढाउन चाहन्छौँ।’