पदच्युतमा अमेरिकाजस्ता 'विदेशी शक्ति'को हात छ् , चाँडै देश फर्किन्छु- अपदस्थ प्रधानमन्त्री शेख हसिना

काठमाडौं । बंगलादेशकी अपदस्थ प्रधानमन्त्री शेख हसिनाले आफ्नो सत्ता पल्टाउन अमेरिकाको हात भएको बताएकी छन्। भारतीय अखबार इकोनोमिक टाइम्ससँग कुरा गर्दै हसिनाले अमेरिकाले मागिरहेको बंगालको खाडीको सेन्ट मार्टिन टापुमा अमेरिकी सेना राख्न दिएको भए आफूलाई यस्तो तनाव नहुने उनले बताइन्।

हसिनाले अमेरिकाले बंगालको खाडी क्षेत्रमा सेना राख्न खोजेको तथा विशेष स्वार्थ भएको भनेको यो पहिलो पटक होइन । उनी प्रधानमन्त्री हुँदै दुई महिना अगाडि बंगलादेश, म्यानमार तथा भारतका मिजोरम तथा मणिपुर क्षेत्र समेटेर ईसाई मुलुक बनाइन लागेको बताएकी थिइन्।

इन्डोनेसियाबाट अलग भएको ईसाई देश पूर्वी टिमोर शैलीमा यस्तो देश दक्षिण एसियामा पनि बनाउन लागिएको उनको दाबी छ, तर प्रधानमन्त्री हुँदा हसिनाले त्यो बनाउन खोज्ने देश अमेरिका भनेर सीधै किटान नगरेर संकेतमा मात्रै भनेकी थिइन्।

अमेरिकाले बंगलादेशी आन्दोलनमा समर्थन गरेको थियो। अरु देशमा भएका आन्दोलनपछिका अल्पसंख्यकहरुको हिंसाविरुद्ध बोल्ने अमेरिकाले बंगलादेशमा भएको अल्पसंख्यक खासगरी हिन्दूमाथि भएको हिंसाको विरोधमा भने मुख खोलेको छैन।

उनले समर्थक र कार्यकर्तालाई दिएको सन्देशमा उनले हार स्विकारे पनि स्वदेश फर्कने वाचा गरेकिछन् ।'म चाँडै फर्कनेछु । हार मेरो हो तर जित बंगलादेशका जनताको हो' उनले भनेकी छन्,'मैले आफूलाई हटाएँ, तिम्रो जित लिएर आएको हुँ, तिमी मेरो शक्ति थियौ, तिमीले मलाई चाहेनौ, म आफैंले छोडेर राजीनामा दिएँ । मेरा कार्यकर्ता जो त्यहाँ छन्, कसैले पनि मनोबल गुमाउने छैनन्। अवामी लिग बारम्बार उठेको छ ।’

पूर्वप्रधानमन्त्रीले हसिनाले उनको शब्दलाई तोडफोड गरेको पनि आरोप लगाइन् । 'म मेरा युवा विद्यार्थीहरूलाई दोहोर्‍याउन चाहन्छु, मैले तपाईंहरूलाई 'रजाकार' भनिनँ । मेरा शब्दहरू तोडमोड गरियो' उनले भनेकी छन् । 'रजाकार' शब्दलाई बंगलादेशमा देशद्रोहीकै रुपमा अपमानजनक मानिन्छ । बंगलादेशको स्वतन्त्रताको लागि १९७१ को युद्धमा पाकिस्तानी सेनासँग सहकार्य गर्ने 'स्वयंसेवक' हरूलाई 'रजाकार' को रुपमा आरोपित गरिन्छ ।