कविता- नामले कायापलट

तिमीले सक्ने भनेकै 
पोष्टर च्यात्ने
पुत्ला दहन गर्ने 
सालिक ढाल्ने हो
हदै गरे गोबर हान्ने हो
यो त रमिता हो ।

तिमीलाई आदर्शले कस्ले सक्छ
विचारले आकाश उल्टाएको हो
भाषणले समाज उत्तेजित पारेकै हो
दुईचार जना आदिवासी टिपेर हिर्काएको हो सडक
नामले कायापलट
आश्वासनले परिवर्तन गरेकै हो ।

सक्नेले त पर्खालै नाध्छ 
काण्ड पुर्याएर परिवर्तन गर्छ
बानी नै परिवर्तन गरेर अघि बढ्छ 
ढ्याँग्रोको तालमा उफ्रने जनता पनि उस्तै
अबस्था सुन्दर बनाउन त 
ढुँगा पर सार्नु पर्छ कान्छा 
आदर्श छाँटेर मात्र नहुने रहेछ ।