गठबन्धनमा सिट बाँडफाँटको टुङ्गो लागिसकेको छैन : उपसभापति खड्का

नेपाली कांग्रेसका उपसभापति एवं प्रशिक्षण विभाग प्रमुख पूर्णबहादुर खड्काले गठबन्धन दलबीच अझै सिट बाँडफाँटको टुङ्गो नलागेको बताउनुभएको छ । भक्तपुरका नेपाली कांग्रेस जिल्ला प्रशिक्षण शाखा भक्तपुरले आज आयोजना गरेको जिल्लास्तरीय प्रशिक्षण कार्यक्रममा उहाँले मङ्सिर ४ को चुनावमा गठबन्धनसहित जाने भए पनि सिट बाँडफाँटको टुङ्गो भने अझै नलागेको बताउनुभयो ।
    
अहिलेको गठबन्धन कांग्रेसका लागि रहर नभई बाध्यता भएको चर्चा गर्दै उहाँले भन्नुभयो, “राजनीतिले यस्तो अवस्था सिर्जना ग¥यो कि, गठबन्धनलाई सँगै लिएर नजाने हो भने कांग्रेस एक्लै चुनाव लड्ने अवस्था छैन, कांग्रेस एक्लै जान खोजे फेरि एमालेसँग माओवादी केन्द्र, समाजवादी, मधेसवादी दलको गठबन्धन हुने अवस्था देखियो, त्यसैले पनि कांग्रेसले गठबन्धन छाड्न सक्दैन ।” 
    
उपसभापति खड्काले संविधानको रक्षा गर्ने एजेण्डा बोकेका दल गठबन्धन तालमेलको अवस्थामा पुगेको बताउँदै उहाँले गठबन्धन कांग्रेसका लागि रुचि नभई बाध्यता भएको बताउनुभयो । गठबन्धनमा सिट बाँडफाँट मिलाउँदा कांग्रेसले पाउने सिट सङ्ख्या घट्नसक्ने भन्दै उहाँले त्यस्तो अवस्थामा नेताले टिकट नपाउने अवस्थालाई बुझिदिन आग्रहसमेत गर्नुभयो ।
    
गठबन्धन गर्दा कांग्रेसलाई बढीभन्दा बढी फाइदा हुने र क्षति कम हुनेगरी नै गठबन्धनमा सिट बाँडफाँट बताउँदै उहाँले गठबन्धनका उम्मेदवार जो भए पनि जिताउने अभियानमा लाग्नुपर्नेमा जोड दिनुभयो । 
    
मङ्सिर ४ गते पछाडि कांग्रेसले बहुमतको सरकार सञ्चालन गर्ने बताउँदै गठबन्धनसहित दुई तिहाइ नजिकको सरकार बनाएर अगाडि बढ्ने उहाँको भनाइ थियो ।    आगामी निर्वाचनमा मतदाताको मन जित्नेगरी घरघरमा जान निर्देशन दिँदै उहाँले भन्नुभयो, “कांग्रेसका कारणले जनताको ठेस पुगेको मनमा के भनेर मन परिवर्तन गर्न सकिन्छ, त्यो गरौँ, मत माग्न नरम, शालिन भएर मतदाताको मन जित्ने गरी जाऔँ ।”
    
कार्यक्रममा कांग्रेस केन्द्रीय सदस्य एवं भक्तपुर इञ्चार्ज अम्बिका बस्नेतले संसद्को गत निर्वाचनमा प्रत्यक्षतर्फ २३ सिट मात्रै जितेको नेपाली कांग्रेसलाई अबको निर्वाचनमा बढीभन्दा बढी कसरी जिताउने, सङ्घमा एक सय ६५ र प्रदेशमा तीन सय ३० मै कांग्रेससहितको गठबन्धनलाई जिताउने अभियानमा लाग्न निर्देशन दिनुभयो । 

अहिले गठबन्धनमा सिट बाँडफाँटमा निकै कठिनाइ आइपरेको चर्चा गर्दै उहाँले टिकट पाउन गरेको प्रतिस्पर्धामा पार्टीले जनतासँग भिजेको व्यक्तिलाई टिकट दिनु स्वभाविकै भएको बताउनुभयो । 
    
कांग्रेस बागमती प्रदेश समितिका महामन्त्री कञ्चन बाँडे श्रेष्ठले कांग्रेस एक भएको सन्देश बोकेर निर्वाचनमा कार्यकर्ता होमिने बेला आएको बताउनुभयो । त्यसअवसरमा कांग्रेस भक्तपुर जिल्ला सभापति दुलर्भ थापाले स्थानीय तहको निर्वाचनमा भक्तपुरमा कांग्रसलाई पहिलो पार्टी बनाएको चर्चा गर्दै मङ्सिर ४ गतेको निर्वाचनमा पनि कांग्रेस अझै सशक्त भएर लाग्ने बताउनुभयो । 
    
टिकटका लागि सङ्घ र प्रदेशमा धेरै आकाङ्क्षी रहेको बताउँदै उहाँले भन्नुभयो, “पार्टीलाई गठबन्धनको सकस छ, भक्तपुरमा धेरै साथी आकाङ्क्षी हुनुहुन्छ, भक्तपुरमा कांग्रेस एक्लै चुनाव लड्न सक्छ तर पार्टीले जसलाई टिकट दिन्छ, जे निर्णय लिन्छ त्यसैलाई मानेर अगाडि बढ्छौँ, चिया पसल, सामाजिक सञ्जालमा जथाभावी लेख्न छाडेर चुनावमा केन्द्रित हुन सबैलाई आह्वान गर्छु ।”     कार्यक्रमका सभापति एवं भक्तपुरका प्रशिक्षण विभाग प्रमुख विजेश अवालले प्रशिक्षणमा दुई सय भन्दाबढी नेता कार्यकर्ताको सहभागिता रहेको बताउनुभयो ।