कञ्चनपुरमा सवारीसाधन दुर्घटना बढ्दै

बिहीबार साँझ महेन्द्रनगरस्थित बसपार्क नजिक बसको ठक्करबाट मोटरसाइकलमा सवार भीमदत्त नगरपालिका–८ का २० वर्षीय सुनिल रानाको मृत्यु भयो । एक दिनअघि बुधबार मात्रै कञ्चनपुरको पुनर्वास नगरपालिका–११ हुलाकी सडकमा मोटरसाइकल दुर्घटना हुँदा दुईजनाको ज्यान गयो । मोटरसाइकल अनियन्त्रित भई बिजुलीको पोलमा ठोक्किँदा मोटरसाइकल चालक कैलालीको धनगढी उपमहानगरपालिका–३ का २३ वर्षीय गुड्डु राना र सोही मोटरसाइकलमा सवार कञ्चनपुरको पुनर्वास नगरपालिका–१० विकास बस्तीका २२ वर्षीय विशाल रानाको मृत्यु भएको हो ।

गत साता मात्रै दुर्घटनामा परी ६ जना घाइते भएका छन् । गत सोमबार पूर्वपश्चिम राजमार्गअन्तर्गत शुक्लाफाँटा नगरपालिका–५ स्थित अर्जुनी ब्यारेक नजिकै भैँसीसँग अटोरिक्सा ठोक्किँदा शुक्लाफाँटा–७ का ४० वर्षीय पुना खत्री, अटोरिक्सामा सवार सोही ठाउँकी ४० वर्षीया राजमती भट्ट र उनका २३ वर्षीय छोरा पुष्पराज घाइते भए । 

सोही दिन गाईसँग मोटरसाइकल ठोक्ँिकदा कृष्णपुर नगरपालिका–६ का ४८ वर्षीय टेकराम चौधरी र पछाडि सवार ५० वर्षीय बाधुराम चौधरी घाइते भए । त्यसैगरी महेन्द्रनगर बजारमा स्कुटर दुर्घटना हुँदा भीमदत्त–१२ का ३५ वर्षीय हेमन्त रावल घाइते भए । गत असारमा पनि पूर्व पश्चिम राजमार्गमा बसले ठक्कर दिँदा स्थानीय ३० वर्षीया बिमला जोशीको मृत्यु भएको थियो । 

जिल्ला ट्राफिक प्रहरी कार्यालयको तथ्याङ्कअनुसार पछिल्लो समय कञ्चनपुरमा  सवारीसाधन दुर्घटनाको दर भयावह देखिएको छ । सवारीसाधन दुर्घटनामा परी हरेक वर्ष धेरैले अकालमै ज्यान गुमाउँदै आएका छन् । गत साउन १ गतेदेखि हालसम्म कञ्चनपुरमा दुर्घटनामा परेर आठजनाको ज्यान गइसकेको छ । दुर्घटनामा १२ जना घाइते भएका छन् । गत आर्थिक वर्षमा जिल्लाभरि एक सयभन्दा बढी सवारीसाधन दुर्घटनामा परेका थिए । ती दुर्घटनामा परी ३१ जनाको मृत्यु भयो भने ६१ जना गम्भीर घाइते भएका थिए । यसैगरी ६४ जना सामान्य घाइते भए । 

सबैभन्दा बढी मोटरसाइकल दुर्घटना हुने गरेका छन् । जिल्ला ट्राफिक कार्यालयका प्रमुख उमेश चन्दका अनुसार पछिल्लो समय सवारीसाधनको अत्यधिक चाप र सडक साँघुरो भएका कारण दुर्घटना बढी हुने गरेका छन् । “सडक साँघुरा छन्, यात्रुको चाप धेरै भयो”, उहाँले भन्नुभयो, “सबैभन्दा बढी मोटरसाइकल दुर्घटनामा परेका छन्, नागरिक सचेत हुन जरुरी छ ।” उहाँले दुर्घटना न्यूनीकरणका लागि ट्राफिक प्रहरीले सवारीसाधनका चालकलाई प्रशिक्षण दिएर सचेत गराउने कार्यक्रम गर्दैआएको बताउनुभयो ।

सामाजिक अभियन्ता मदन चन्द चालक र सरकारी निकाय दुर्घटनामा उत्तिकै दोषी देख्नुहुन्छ । “चालकको लापर्बाही त छँदै छ, सरकारी पक्षको पनि गल्ती देखिन्छ,” उहाँले भन्नुभयो, “चालकले थाहा भएर पनि ट्राफिक नियम उल्लङ्घन गर्दैआएका छन्, तर त्यसको अनुगमन छैन ।” उहाँले चालक, ट्राफिक प्रहरी, आम नागरिक सबै सचेत भए मात्रै दुर्घटना न्यूनीकरण हुने बताउनुभयो  ।

स्थानीय लक्ष्मी जोशी पछिल्लो समय मोटरसाइकल बढी दुर्घटना भइरहेको बताउँछन् । “मोटरसाइकल चालक अन्धाधुन्द चलाउँछन्, क्षमताभन्दा बढी यात्रु राखेर सवारी चलाइराखेका हुन्छन्”, उहाँले भन्नुभयो, “कानुन पनि फितलो भएका कारण दुर्घटना बढिरहेका छन् ।” उहाँले सवारी दुर्घटनामा मानवीय क्षति भए पनि आर्थिक लेनदेनमा कुरा मिलेर चालकलाई कारबाही नहुने भएका कारण पनि उनीहरुले लापरबाही गर्ने गरेको बताउनुभयो ।