सरकारले प्रतिपक्षी दलका नेताहरुसँग प्रतिशोध साँधिरहेको छ - मनिष झा

काठमाडौं । राष्ट्रिय स्वतन्त्र पार्टी (रास्वपा) का नेता एवं प्रतिनिधि सभा सदस्य मनिष झाले सरकारले प्रतिपक्षी दलका नेताहरुसँग प्रतिशोध साँधिरहेको बताएका छन् । आज (मंगलबार) प्रतिनिधि सभाको बैठकलाई सम्बोधन गर्दै उनले सरकारको प्रतिशोधमा रास्वपाका सभापति रवि लामिछाने र नागरिक उन्मुक्ति पार्टी (नाउपा) का संरक्षक रेशम चौधरी परिसकेको बताएका हुन् ।

नेता झाले अब सरकारको प्रतिशोधको निसानामा एकीकृत समाजवादीका अध्यक्ष माधव कुमार नेपाल, जनमत पार्टीका अध्यक्ष सिके राउतलगायत रहेको पनि बताए । उनले यसरी राजनीतिक प्रतिशोधका आधारमा जे पनि गर्न थालिएको खण्डमा चुप लागेर बस्न नसकिने पनि बताए ।

‘हालसालै भइराखेको राजनीतिक प्रतिशोधको केही घटनाहरुमा पार्टीको तर्फबाट ध्यानाकर्षण भएको र हाम्रो सरोकार रहेको कुरा पनि राख्न चाहन्छौं । हाम्रो पार्टी सभापतिमाथि भयो, हालसालै रेशम चौधरीमाथि भयो । माधवकुमार नेपालज्यूको पनि बयान लिइँदैछ भन्ने सुन्दैछौं । अब के सिके राउतप्रति आक्रमण हुन्छ कि ? यो सबै कुरालाई हामीले एउटा राजनीतिक प्रतिशोधको क्रमको रुपमा रहिराखेका छौं । गम्भीरतापूर्वक लिइराखेका छौं । सधैं चुप लाग्ने अवस्था नरहन पनि सक्छ,’– उनले भने ।