सर्वोच्च अदालतद्वारा प्रदीप अधिकारीलाई धरौटीमा छाड्न अस्वीकार

काठमाडौं। सर्वोच्च अदालतले नेपाल नागरिक उड्डयन प्राधिकरणका महानिर्देशक प्रदीप अधिकारीलाई पुर्पक्षका लागि थुनामा पठाउने विशेष अदालतको आदेश सदर गरेको छ। सर्वोच्चका न्यायाधीशद्वय हरिप्रसाद फुयाल र शान्तिसिंह थापाको संयुक्त इजलासले विशेषको आदेशलाई सदर गरेको हो। 

यसअघि विशेष अदालतका न्यायाधीशहरू हेमन्त रावल, डिल्लीरत्न श्रेष्ठ र विदुर कोइरालाको इजलासले अधिकारीलाई थुनामा पठाउने आदेश जारी गरेको थियो । उक्त आदेशविरुद्ध अधिकारीले सर्वोच्च अदालतमा रिट निवेदन दायर गरेका थिए । सो रिटमाथि सुनुवाइ गर्दै सर्वोच्चको संयुक्त इजलासले धरौटीमा छाड्ने माग अस्वीकार गरेको हो ।

अधिकारीलाई विशेष अदालतले गत मंसिर २१ गते गते नलिञ्चोक हेलिपोर्ट निर्माणमा भ्रष्टाचार गरेको अभियोगमा पुर्पक्षका लागि थुनामा पठाउने आदेश गरेको थियो। अख्तियारले अधिकारीसँग उक्त भ्रष्टाचार काण्डमा १३ करोड ५७ लाख ४६ हजार २१३ रुपैयाँ बिगो दाबी माग गरेको छ।