रास्वपाको जनयात्रा अभियान सुरु, राज्यले नियतबस लामिछानेमाथि अन्याय गरेको नेताहरुको टिप्पणी

काठमाडौं। राष्ट्रिय स्वतन्त्र पार्टीले जनयात्रा अभियानको शुभारम्भ गरेको छ। शनिबार चितवनबाट रास्वपाका शीर्ष नेताहरुले जनयात्रा अभियानको घण्टी बजाएर शुभारम्भ गरेका हुन्। जनयात्रा अभियानको शुभारम्भलाई पार्टी सभापति रवि लामिछानेले विशेष सम्बोधन गर्ने भनिएतापनि उनलाई शुक्रबार राती नै प्रहरीले पक्राउ गरेपछि अन्य नेताहरुले सम्बोधन गर्दै जनयात्रा शुभारम्भ गरेका थिए।

सो क्रममा रास्वपा उपसभापति डा स्वर्णिम वाग्लेले राज्यले नियतबस लामिछानेमाथि अन्याय गरेको बताए। उच्च अदालतको आदेश जिल्ला अदालतमा नपुर्‍याई बदला लिने उदेश्यले सरकारले लामिछानेलाई रातारात पक्राउ गरेको उनले बताए।

यसअघि लामिछानेले आफूलाई पक्राउ गरेपनि जनयात्रा अभियान नरोक्न नेताहरुलाई निर्देशन दिएका थिए। जनताको कुरा सुन्ने भन्दै रास्वपाले जनयात्रा अभियान सुरु गरेको हो।

उपसभापति डा.स्वर्णिम वाग्लेले काठमाडौंमा अहिले दुई ठूला राजनीतिक नेपाली कांग्रेस र नेकपा (एमाले) ले कब्जाको खेती चलाइरहेको बताए ।  सभालाई सम्बोधन गर्दै उनले पूराना राजनीतिक दलहरुले पदलाई औजार बनाएर अकुत सम्पत्ति कमाइरहेको बताए। ती राजनीतिक दलका नेताहरुले कमाएको अकुत सम्पत्ति व्यवस्थापनका लागि अख्तियार, प्रहरी प्रशासनलागयतका संयन्त्र कब्जा गरेको बताएका हुन् ।

‘काठमाडौंमा कब्जाको खेती चलिरहेको छ । यी पुराना पार्टीहरुको भ्रष्टाचारको कहानी तपाईँहरुले सुनिसक्नुभयो । यिनीहरुले के गरे भने पदमा गएर देश बनाउने होइन कि अकुत सम्पत्ति कमाउने औजारको रुपमा दुरुपयोग गरे । त्यसपछि एकदम अगाडि बढे । कमाएको स्रोत खुलाउन नसकेपछि जेल गइन्छ कि भनेर त्यो जेल हाल्ने निकायलाई कब्जा गर्नेनिर यिनीहरु लागे । आज अख्तियार आदि हेर्नुभयो भने कोटाबाट आफन मान्छे राखेका छन् । प्रहरीमा चमर राजनीतिकरण गरेका छन्,’– उनले भने ।

साथै, सशस्त्र प्रहरी बलमा पनि त्यस्तै खालको कब्जा भएको उनले बताए । आफ्नो नातेदार भएकै कारण ७२ नक्बरमा रहेका एक जनालाई सकरारमा रहेकाहरुले उकासेको उनले आरोप छ । तिनै मान्छेलाई भविष्यमा सशस्त्रको आईजीपी बनाउने तयारी रहेको पनि उनले बताए । ‘सशस्त्रमा ७४ जनामा ७२ नम्बर आएको अन्तिमतिरको एउटा लट्ठुलाई आफ्नो नातेदार भएको कारणले नै उकास्दै, उकास्दै अबको केही वर्षमा उसलाई आईजीपी बनाउने यहाँ खेल भइरहेको छ,’– उनले भने ।

साथै, कांग्रेस–एमालेहरु रास्वपाले २०७९ को निर्वाचनमा ल्याएको मतबाट त्रसित रहेको उनले बताए । आगमी ०८४ को निर्वाचनसँग डराएर उनीहरुले पार्टी सभापति रवि लामिछानेमाथि निरन्तर प्रहार गरिरहेको उनको दाबी छ । ‘अहिलेको कांग्रेस–एमाले गठबन्धनको कायरता, किन तर्सिरहेका छन् यिनीहरु ? किन कामिरहेका छन् यिनीहरु यसरी भन्दाखेरी त्यो कायरताको पछाडि अंकगणित छ । ७० वर्षसम्म राजनीति गरेका कांग्रेस–एमालेले ०७९ को चुनावमा पाएकको मत जम्मा २७÷२८ लाख हो । पाँच महिना मैदानमा उत्रिएर रास्वपाको घण्टी चुनाव चिन्हमा झण्डै १२ लाख । आज कोही पनि यी पुराना पार्टीमा जान इच्छुक छैनन् । यिनीहरुले भविष्यका आँकलन गरिसके,’– उनले भने ।

उनले भने– ‘सभापतिज्यूले आज केही कुरा राख्ने उद्घोष गर्नुभएको थियो ।  सायद त्यो कुराले डराएर पनि हुनसक्छ । यो कार्यक्रममा कुनै हालतमा सहभागी हुन नदिन लामो समयदेखि प्रपञ्च बुनिराखेको म बुझ्छु ।’ शुक्रबार साँझ सभापति लामिछानेसँग कुरा हुँदा उनले सर्वोच्च अदालतमा जाने आफूलाई बताएको वाग्लेले सुनाए । उनका अनुसार सो कुराकानीमा लामिछानेले आफूलाई आज नै पक्राउ गर्छ भन्ने नलागेको बताएका थिए ।
 

‘भोलि चितवनमा सहभागी भएर कहाँ जानुपर्ने हो जान्छु भनेर भन्नुभएको थियो,’ उनले भने, ‘७ बजेतिर फैसला आउने, दुनियाँको ठुलो अपराधीलाई पक्राउन गर्न लागेको जस्तो गरेर, आकाश नै खस्ला जस्तो गरेर धरपकड गरियो । यो असाध्य निन्दनीय छ ।’

आज बुटवल लैजान अघि लामिछानेसँग भएको कुराकानी उद्धृत गर्दै भने, ‘हेर्नुस् के के न बित्यो भनेर ल्यायो । दाल भात खुवाएर राखेका छन्, आज पनि बिदा भोलि पनि बिदा ।’

वाग्लेले उच्च अदालतले रविलाई पक्राउ गर्न भनेर दिएको ७–८ पानाको फैसलामा क्यानडा, हिन्दुस्तानको उदाहरणहरू दिइएको सुनाए । उनले भने, ‘कस्ता कस्ता ट्यालेन्टेड न्यायामूर्तिहरु आएछन् भन्ने लाग्यो । त्यो बहस सकिएको दिन लेख्न सक्ने फैसला नै थिएन । त्यो तानाबाना पहिले नै बुनिएको रहेछ ।’

यसले चितवनमा बोल्न नदिन कानुनराजको धज्जी उडाएको प्रमाणित भएको दाबी उनले गरे । उनले अरूले लोकतन्त्र र गणतन्त्रको खोल मात्र ओढ्ने भए पनि आफ्नो पार्टी विधिको शासन मान्ने पार्टी भएको जिकिर गरे । उनले यही व्यवस्थालाई थप सुदृढ बनाउनुपर्छ भनेर मन वचनले काम गरिरहेको बताए ।

यस्तै पार्टीका नेता एवं प्रतिनिधि सभा सदस्य हरि ढकालले पार्टी सभापति रवि लामिछानेको मुटुमा रगत नभएर तेजाव रहेको टिप्पणी गरे । आज (शनिबार) चितवनको ‘जनयात्रा’ लाई सम्बोधन गर्दै उनले प्रतिशोध साँध्नेहरु लामिछानेको मुटुमा भएको तेजावबाट एकदिन जलेर भष्म हुने बताए ।

आगामी २०८४ सालमा हुने निर्वाचनलाई लिएर निदाउन नसकेकाहरुले लामिछानेमाथि प्रतिशोध साँधेको उनको दाबी छ । ‘आज २०८४ सम्झेर निदाउनै नसक्नेहरुले प्रतिशोध साँधेका छन् । मैले भनिसकेँ– रवि लामिछानेको मुटुमा रगत होइन, तेजाव छ । यिनीहरु जल्ने छन्, यिनीहरु गल्ने छन्,’– उनले भने ।

आगामी २०८४ को चुनावमा संसारभरी रहेका नेपालीहरुलाई रास्वपासँग जोडिएर मतदान गर्न उनले आग्रह गरे । नेता ढकालले रास्वपाले बहुमत पाएर सरकार बनाएपछि ३२ वर्षसम्म देशलाई केही नदिएर लुट्नेहरु जेलमै सड्ने दाबी गरे । ‘यो ३२ वर्षसम्मको समय सजिलै वितेर जान दिने छैनौं । यिनीहरुको दशदान, बैतर्नी जेलभित्र गर्ने हो,’– उनले भने ।