एमाले केन्द्रीय कमिटी बैठक सुरु,ओलीले राजनीतिक प्रतिवेदन पेस गर्दै

काठमाडौं । नेपाल कम्युनिष्ट पार्टी (एमाले) केन्द्रीय समिति बैठक सुरु भएको छ । पार्टी केन्द्रीय कार्यालय च्यासलमा बैठक सुरु भएको हो । बैठकमा पार्टी अध्यक्ष एवं प्रधानमन्त्री केपी शर्मा ओलीले राजनीतिक प्रतिवेदन प्रस्तुत गर्नेछन्। यसअघि प्रतिवेदनमाथि समूहगत छलफल हुने गरेकामा यसपटक भने प्रत्येक केन्द्रीय सदस्यलाई बेग्लाबेग्लै धारणा राख्ने व्यवस्था मिलाइएको छ । प्रत्येक सदस्यलाई ३ मिनेट बोल्ने समय दिईनेछ ।

एमाले अध्यक्ष ओलीले पेश गर्ने राजनीतिक प्रतिवेदनमा गठबन्धन सरकार, सरकार सञ्चालन भएको ६ महिनाको उपलब्धी र आगामी दिनमा गर्नुपर्ने काम उल्लेख गरिएको प्रचार विभाग प्रमुख रहेका राजेन्द्र गौतमले जानकारी दिए । नेता गौतमले ओलीले पेश गर्ने राजनीतिक प्रतिवेदनमा पार्टीको संगठनात्मक जीवनलाई बलियो बनाउन सञ्चालन गरिने ३ महिने अभियानबारे पनि उल्लेख रहेको बताए ।

‘प्रधानमन्त्री तथा पार्टीका अध्यक्षज्यूबाट आजको समसामयिक विकसित नेपाली राजनीतिको सन्दर्भमा, त्यसको बहुआयमिक पक्षमा, खासगरी अहिले विकसित राजनीतिक घटनाक्रम, सरकार गठन, सरकारले गरेका काम र गर्नुपर्ने कामहरु, पार्टीको संगठनात्मक अवस्था, पार्टीको केन्द्रीय संगठन विभागले गरेको राष्ट्रिय कार्यशालाबाट निकालेको निष्कर्षहरु र त्यसले सञ्चालन गर्ने तीन महिने संगठनसम्बन्धि अभियानजस्ता आन्तरिक विषयमा केन्द्रीत भएर पार्टी अध्यक्षको तर्फबाट बैठकमा राजनीतिक प्रतिवेदन प्रस्तुत हुने छ,’– उनले भने ।

बैठकमा तीन सय ५७ केन्द्रीय सदस्य, सात प्रदेशका अध्यक्ष र चारवटा केन्द्रीय आयोगका प्रमुख सहभागी हुनेछन् । दुई दिनभित्र बैठक सक्ने तयारी छ।