अस्ट्रेलियालाई पेनाल्टी सुटआउटमा हराउँदै इजिप्ट अन्तिम १६ मा प्रवेश

काठमाडौं। इजिप्टले इतिहास रच्दै पहिलोपटक फिफा विश्वकपको अन्तिम १६ मा स्थान बनाएको छ। अमेरिकाको टेक्सासमा भएको रोमाञ्चक अन्तिम–३२ को खेलमा अष्ट्रेलियालाई पेनाल्टी सुटआउटमा ४–२ ले पराजित गर्दै इजिप्टले यो नयाँ इतिहास रचेको हो।

निर्धारित ९० मिनेट र थप गरिएको ३० मिनेटको अतिरिक्त समयको खेल १–१ को बराबरीमा सकिएपछि खेलको निर्णय पेनाल्टी सुटआउटबाट लिइएको थियो। पेनाल्टीमा होसाम अब्देलमागुइदले निर्णायक गोल गर्दै इजिप्टलाई ऐतिहासिक जित दिलाए। अब इजिप्टले क्वार्टरफाइनल प्रवेशका लागि मंगलबार एटलान्टामा लियोनल मेसीको अर्जेन्टिना र केप भर्डबीचको खेलको विजेतासँग प्रतिस्पर्धा गर्नेछ।

यसअघि खेलको १३औँ मिनेटमा इमाम आशौरको गोलमार्फत इजिप्टले सुरुवाती अग्रता लिएको थियो। करिम हाफेजको क्रसलाई आशौरले उत्कृष्ट हेडरमार्फत जाली चुमाउँदै प्रतियोगितामा आफ्नो व्यक्तिगत दोस्रो गोल पूरा गरे। तर, ५५औँ मिनेटमा अष्ट्रेलियाले खेललाई बराबरीमा ल्यायो। इजिप्टका डिफेन्डर मोहम्मद हानीले दबाबमा आफ्नै पोस्टमा हेड गरेपछि अष्ट्रेलियाले आत्मघाती गोलको उपहार पाएको थियो। यस प्रतियोगितामा हानीको यो दोस्रो आत्मघाती गोल हो।

ह्यामस्ट्रिङको चोटबाट मुक्त हुँदै मैदान फर्किएका इजिप्टका कप्तान मोहम्मद सलाहले खेलभर अपेक्षाअनुसारको प्रभाव छाड्न सकेनन्। अतिरिक्त समयमा उनले गोल गर्ने सुवर्ण अवसर गुमाएका थिए भने अष्ट्रेलियाका गोलकिपर प्याट्रिक बिचले रामीको प्रहारलाई उत्कृष्ट बचाउ गर्दै खेललाई पेनाल्टी सुटआउटसम्म पुर्‍याए। खेलको सुरुवातमै अष्ट्रेलियाका क्रिस्टियन भोल्पाटोको प्रहार क्रसबारमा लागेर फर्किएको थियो भने दोस्रो हाफको सुरुमा इजिप्टका ओमार मार्मुशले बललाई पोस्टको दिशा दिन चुकेका थिए।

पेनाल्टी सुटआउटलाई ध्यानमा राख्दै अष्ट्रेलियाका प्रशिक्षक टोनी पोपोभिचले अन्तिम समयमा अनुभवी गोलकिपर म्याथ्यु रायनलाई मैदान पठाए पनि उनको यो रणनीति सफल हुन सकेन। अष्ट्रेलियाका लागि पहिलो पेनाल्टी प्रहार गरेका ह्यारी साउटरको प्रहार बारभन्दा माथि अकासिएपछि टोली दबाबमा परेको थियो। त्यसपछि दुवै टोलीका खेलाडीहरूले लगातार गोल गरे, जसमा इजिप्टका सलाहले पनि सहजै गोल परिणत गरे।

तर, अष्ट्रेलियाका १८ वर्षीय डिफेन्डर लुकास हेरिङ्टनको प्रहार क्रसबारमा लागेर बाहिरिएपछि इजिप्टले जितको सुनौलो अवसर पायो। अन्तिम प्रहारमा होसाम अब्देलमागुइदले कुनै गल्ती नगर्दा इजिप्ट ४–२ ले विजयी भयो। ऐतिहासिक जितसँगै इजिप्टका कप्तान सलाह भावुक बन्दै मैदानमै रोएका थिए भने अष्ट्रेलियाली खेलाडीहरू निकै निराश देखिए। समूह चरणमा न्युजिल्यान्डलाई ३–१ ले पराजित गर्दै विश्वकपमा आफ्नो पहिलो जित दर्ता गरेको इजिप्टले, यसै संस्करणमा अर्को ठूलो उपलब्धि थप्दै पहिलोपटक विश्वकपको नकआउट चरण पार गर्न सफल भएको छ।