प्रधानमन्त्री प्रचण्ड लाई विश्वासको मत दिन माधव नेपाल सकारात्मक

काठमाडौं । नेकपा एकीकृत समाजवादीका अध्यक्ष माधव कुमार नेपाल प्रधानमन्त्रीलाई विश्वासको मत दिन सकारात्मक देखिएका छन् । प्रधानमन्त्री पुष्पकमल दाहाल प्रचण्ड र एकीकृत समाजवादीका अध्यक्ष नेपालबीच माओवादी केन्द्रको संसदीय दल कार्यालय सिंहदरबारमा आज भेटवार्ता भएको थियो ।

भेटमा प्रधानमन्त्री प्रचण्डले आफू नेतृत्वको सरकारलाई विश्वासको मत दिन आग्रह गरेको प्रचण्डका स्वकिय सचिव रमेश मल्लले बताए ।

प्रधानमन्त्रीको प्रचण्डको आग्रहपछि अध्यक्ष नेपालले आफूले पार्टीमा छलफल गर्ने जवाफ दिएका थिए । अध्यक्ष नेपालले भने, ‘प्रचण्डजीले विश्वासको मत दिन आग्रह गर्नुभएको छ । मैले यसबारे पार्टीमा छलफल गर्छु भनेको छु । अब पार्टीबाट निर्णय गर्छौं ।’

उनले आजको भेटमा सरकारमा जानेबारे भने कुनै कुरा नभएको सुनाए । प्रचण्ड नेतृत्वको सरकारमा सहभागिताबारे नेकपा एकीकृत समाजवादीले कुनै निर्णय गरेको छैन । शनिबारदेखि चार दिनसम्म बसेको पार्टी स्थायी कमिटी र पोलिटब्युरो बैठकले पनि कुनै ठोस निर्णय गर्न सकेन ।

अहिलेको राजनीतिक अवस्था, सरकारको नीति तथा कार्यक्रम नै स्पष्ट नरहेकाले प्रचण्डको अनुहार हेरेर मात्रै समर्थन गर्न नसकिने उनले बताए । अध्यक्ष नेपालले सवैको राय बिचार लिएर सरकारका बिषयमा संस्थागत निर्णय लिने जिकिर गरे ।

प्रधानमन्त्री दाहालले पुस २६ गते विश्वासको मत लिँदैछन् । एकीकृत समाजवादीभित्र पनि सरकारलाई विश्वासको मत दिएर सहभागी हुनुपर्ने आवाज उठेको छ। प्रधानमन्त्री प्रचण्डले एकीकृत समाजवादीलाई सरकारमा ल्याउन पहल गरिरहेका बेला आज भएको भेटलाई अर्थपूर्ण रुपमा हेरिएको छ।