बालेन शाहले गरे पाथीभरा माताको दर्शन

ताप्लेजुङ । राष्ट्रिय स्वतन्त्र पार्टीका वरिष्ठ नेता बालेन शाहले ताप्लेजुङस्थित प्रसिद्ध शक्तिपीठ पाथीभरा मन्दिरको दर्शन गरेका छन् । आगामी फागुन २१ गते हुने प्रतिनिधिसभाको निर्वाचनका लागि पूर्वी नेपालको चुनावी अभियानमा रहेका शाहले आज बिहान पाथीभरा माताको दर्शन गरी पूजाअर्चना गरेका हुन् ।

चुनावी अभियानलाई तीव्र बनाउन पूर्वी नेपाल पुगेका शाहसँगै उनको टोलीमा रहेका अन्य प्रतिनिधिहरूले पनि पाथीभरा मन्दिरको दर्शन गरेका छन् । मन्दिर दर्शनपछि शाहले मुलुकको समृद्धि र परिवर्तनका लागि दैवी शक्तिको आशीर्वाद र जनताको साथ अपरिहार्य रहेको बताए । आगामी फागुन २१ गते हुने प्रतिनिधिसभा निर्वाचनमा बालेन शाहले झापा निर्वाचन क्षेत्र नम्बर ५ बाट उम्मेदवारी दिएका छन् । यस क्षेत्रलाई यतिबेला निकै चासोका साथ हेरिएको छ, किनभने शाहले नेकपा एमालेका अध्यक्ष एवं पूर्व प्रधानमन्त्री केपी शर्मा ओलीसँग सिधा प्रतिस्पर्धा गर्दैछन् ।

हाइप्रोफाइल भिडन्त हुने निश्चित भएपछि शाह यतिबेला पूर्वी नेपालका विभिन्न जिल्लाहरूमा पुगेर जनमत आफ्नो पक्षमा पार्ने कसरतमा छन् । पाथीभराको दर्शनसँगै उनले आफ्नो चुनावी अभियानलाई थप ऊर्जाका साथ अगाडि बढाउने संकेत दिएका छन् ।

झापा(५ मा एमाले अध्यक्ष ओली र रास्वपाका वरिष्ठ नेता शाहबीचको यो प्रतिस्पर्धालाई राष्ट्रिय राजनीतिमा निकै महत्त्वका साथ हेरिएको छ । रास्वपाका कार्यकर्ताहरूले शाहको पक्षमा जनलहर बढ्दै गएको दाबी गरेका छन् भने ओलीको पकड क्षेत्र मानिने झापा(५ मा शाहको आगमनले चुनावी प्रतिस्पर्धालाई थप रोचक बनाएको छ ।

गाडी जाने अन्तिम बिन्दुबाट करिब ४ घण्टाको पैदल यात्रापछि मात्रै मन्दिर पुगिन्छ। ३ हजार ७ सय ९४ मिटरको उचाइमा रहेको पाथीभरा पछिल्लो समय युवाहरूमाझ हाइकिङ ट्रेलका रूपमा पनि लोकप्रिय छ। सोही रुट हुँदै बालेन पनि हाइकिङ गरेर मन्दिर पुग्नेका हुन् ।

शाहले पाथीभरा देवीको दर्शन गरी पुनः झापाको दमक फर्किने कार्यतालिका छ। पहाडी जिल्लाको छोटो भ्रमण र दर्शन सकेर दमक फर्केलगत्तै बालेनले आफ्नो निर्वाचन क्षेत्रमा घरदैलो अभियान सुरु गर्ने तयारी गरेका छन् । 

हेर्नुहोस् तस्वीरहरू