सरकारको काम कारबाहीबाट जनता सन्तुष्ट छैनन - अध्यक्ष माधव कुमार नेपाल

काठमाडौं । नेकपा (एकीकृत समाजवादी) का अध्यक्ष माधव कुमार नेपालले सरकारको काम कारबाहीबाट जनता सन्तुष्ट नरहेको बताएका छन् । आज (मंगलबार) पिस्कर स्मृति दिवसको सन्दर्भमा आयोजित कार्यक्रमलाई सम्बोधन गर्दै उनले मुलुक चलाउने जिम्मेवारीमा कम्युनिष्ट भनिएको पार्टीको मान्छे रहँदासमेत जनता सन्तुष्ट नभएको बताएका हुन् । उनले कम्युनिष्टको नाममा गैरकम्युनिष्ट काम भइरहेको बताए ।

‘कम्युनिष्ट पार्टी भनिएका मान्छेहरु छन्, मुलुक चलाउने जिम्मेवारी भएका । तर, जनता सन्तुष्ट हुन सकिरहेका छैनन् । कम्युनिष्ट भइर मात्रै पनि पुग्दोरहेनछ,’– उनले भने ।

नेता नेपालले कम्युनिष्टको नाममा राजनीति गर्नेहरुले कम्युनिष्टको मर्यादा राख्नुपर्ने, त्याग, तपस्या र बलिदानी कायम गर्न सक्नुपर्ने बताए ।

कम्युनिष्ट पार्टीका नेताले पटक/पटक मुलुक सञ्चालन गरे पनि जनता सन्तुष्ट हुन नसकेको उनले बताए। अध्यक्ष नेपालले पञ्चायती व्यवस्था र राजतन्त्रका साथै ठूला–ठूला द्वन्द्व समाधान गरेकाले नेपालीले आफूलाई कमजोर ठान्नुपर्ने अवस्था नरहेको धारणा राखे।

पाँच हजार वर्ष पुरानो देश नेपाललाई अघि बढाउने जिम्मेवारी सवैको रहेको उनको भनाइ छ। उनले अन्तराष्ट्रिय साम्राज्यवाद र घरेलु प्रतिक्रियावादका विरुद्ध निरन्तर लड्नुपर्नेमा जोड दिए।

अध्यक्ष नेपालले आफ्नो पार्टीले बेठिक कुराको विरोध र सहि कुराको समर्थन गर्र्दै न्यायको पक्षमा आवाज उठाउने धारणा राखे। उनले पिस्कर दमन र प्रतिरोधको कथा भएको स्मरण गरे। निरंकुश व्यवस्थाविरुद्ध संघर्षको विगुल फुकेका योद्धाले २०४० साल माघ १ गते सिन्धुपाल्चोकको पिस्करमा साहदात प्राप्त गरेको दिनलाई पिस्कर स्मृतिका रुपमा मनाउने गरिन्छ।