आइपिएल लिलामी : श्रेयस अय्यर सवा १२ करोडमा बिके, कप्तान समेत बनाइने सम्भावना

काठमाडौं। इण्डियन प्रिमियर लिगको लिलामी सुरु भएको छ । आजको लिलामीमा अहिलेसम्म भारतीय ब्याटर श्रेयस अय्यर सबैभन्दा महंगोमा बिकेका छन् । उनलाई कोलकाता नाइट राइडर्सले सवा १२ करोडमा किनेको छ ।

कोलकाताले अहिलेसम्म आफ्नो कप्तान घोषणा गरेको छैन । यस्तोमा श्रेयस कोलकाताको कप्तान बन्न सक्ने सम्भावना उच्च छ । उनी यसअघि दिल्ली क्यापिटल्सका कप्तान थिए । आजको लिलामीमा न्यूजिल्याण्डका फास्ट बलर ट्रेन्ट बोल्टलाई राजस्थान रोयल्सले ८ करोडमा किनेको छ ।

लिलामीमा दक्षिण अफ्रिकाका फास्ट बलर कागिसो रबाडा सवा ९ करोड रुपैयाँमा बिकेका छन् । उनलाई पंजाब किंग्सले सवा ९ करोड मूल्यमा अनुबन्ध गरेको छ । मेगा अक्सनमा पहिलो बोली भारतीय राष्ट्रिय टिमका ओपनर शिखर धवनका लागि लगाइएको थियो । धवन सवा ८ करोड रुपैयाँमा बिकेका छन् । उनलाई पंजाब किंग्सले किनेको छ ।

धवनको लागि बोली लगाउन दिल्ली क्यापिटल्सले सुरु गरेको थियो । त्यसपछि दिल्ली र राजस्थानबीच धवनलाई किन्नको लागि प्रतिस्पर्धा चल्यो । तर, अन्ततः पंजाब किंग्सले ८.२५ करोड मूल्यमा धवनलाई आफूसँग अनुबन्ध गर्यो ।

यस्तै भारतीय स्पिनर रविचन्द्रन अश्विन ५ करोडमा बिकेका छन् । अश्विनको लागि पनि पहिलो बोली दिल्लीले नै लगाएको थियो । दिल्लीसँग अश्विनलाई किन्नको लागि राजस्थान रोयल्सको प्रतिस्पर्धा भयो । अन्ततः राजस्थानले ५ करोडमा अश्विनलाई अनुबन्ध गरेको छ ।

यस्तै अस्ट्रेलियाका टेस्ट टिमका कप्तान प्याट कमिन्स सवा ७ करोड रुपैयाँमा बिकेका छन् । उनलाई कोलकाता नाइटराइडर्सले अनुबन्ध गरेको छ ।