भियतनामविरुद्ध सुखद नतिजाको अपेक्षामा नेपाल --जितकै लागि खेल्ने भियतनामी प्रशिक्षकको भनाई 

काठमाडौं । नेपाली टिमका मूख्य प्रशिक्षक अनन्त राज थापाले, पेरिस ओलम्पिक अन्तर्गत महिला फुटबलको एसिया छनोट अन्र्तगत पहिलो चरणको पहिलो खेलमा सुखद नतिजाको अपेक्षा गरिएको बताएका छन् ।  

खेलको पूर्वसन्ध्यामा आयोजित पत्रकार सम्मेलनमा उनले फिफा वरीयतामा आफूभन्दा माथि रहेको भियतनामविरुद्ध सुखद नतिजाको अपेक्षासहित मैदान उत्रने बताएका हुन् ।

‘दोस्रो चरणमा पुग्नका लागि राम्रो प्रदर्शन गर्ने लक्ष्य छ । ’ मुख्य प्रशिक्षक थापाले भने ‘राम्रो विपक्षीविरुद्ध खेल्दै छौँ । भियतनामले विश्वकप समेत खेल्दैछ । वरीयता हामीभन्दा धेरै माथि छ, हाम्रो टिममा राम्रा खेलाडी छन् । एक महिनाबाट तयारी गरिरहेका छौँ । राम्रो प्रदर्शन गर्ने छौँ । सुखद नतिजाको अपेक्षा छ ।’

प्रशिक्षक थापाले भियतनाम बलियो टोली भएपनि आफुहरु जित निकाल्दै दोस्रो चरणमा पुग्ने लक्ष्यमा रहेको बताए । उनले भने ‘ हाम्रो अन्तिम लक्ष्य भनेको दोस्रो चरणमा पुग्ने हो । हामी राम्रो प्रदर्शन गरेर जान्छौं ।’ 

भियतनामले २०२३ को महिला विश्वकप खेल्दैछ । फिफा वरीयतामा भियतनाम ३३ औं स्थानमा रहेको छ  । नेपाल १०० औं स्थानमा छ ।
नेपाली राष्ट्रिय टिमका गोलकिपर तथा कप्तान एन्जिला तुम्बापो सुब्बाले भियतनाम वरीयतामा माथि भएपनि आफूहरु पनि जितकै लागि मैदानमा उत्रिने बताईन् ।
उनले भनिन् ‘मैदान पसेपछि हार्ने मन हुँदैन, हामी अन्तिमसम्म राम्रो नतिजाका लागि प्रयास गर्छौ, अन्तिमसम्म फाइट गर्यौं भने राम्रो नतिजा आउने छ ।’

भियतनामका मुख्य प्रशिक्षक माई डक चुङले नेपालको टोली राम्रो रहेको भन्दै खेल प्रतिस्पर्धात्मक हुने बताए । दोभाषे मार्फत उनले नेपालसँग प्रभावशाली टोली रहेको बताए ।

कप्तान हुय्न्हु न्हुले नेपालविरुद्ध जितकै लागि खेल्ने बताईन् । उनले भनिन् ‘नेपाललाई हामी सम्मान गर्छौं । हामी यहाँ जित्नका लागि आएका हौँ । ’
नेपालले भोलि बुधबार भियतनामसँग प्रतिस्पर्धा गर्दैछ ।

त्रिपुरेश्वरस्थित दशरथ रंगशालामा नेपालले बलियो प्रतिद्वन्दी भियतनामसँग खेल्नेछ । नेपाल र भियतनामबीचको खेल साँझ ६ बजे सुरु हुनेछ ।
पछिलो चरणको छनोटको समूह ’सी’ मा नेपाल र भियतनामले मात्र खेल्न लागेका हुन् ।

प्यालेस्टाइन र अफगानिस्तानले नाम फिर्ता लिएपछि यो समूहमा नेपाल र  भियतनाम मात्र रहेका छन् । नेपालले दोस्रो खेलमा भियतनामसँग शनिबार प्रतिस्पर्धा गर्नेछ ।  छनोटको शीर्ष टोलीले दोस्रो चरणमा स्थान बनाउने छन् ।