नेपाल पुरुष फुटबलको मुख्य प्रशिक्षकमा इटलीका अल्बर्टो एनेस नियुक्त

काठमाडौं । नेपाली राष्ट्रिय पुरुष फुटबल टिमको मुख्य प्रशिक्षकमा इटलीका भेन रेन्जो अल्बर्टो एनेस नियुक्त भएका छन् ।

अखिल नेपाल फुटबल संघ एन्फाको बिहीबार बसेको कार्यसमिति बैठकले इटलीका एनेसलाई मुख्य प्रशिक्षक नियुक्त गर्ने निर्णय गरेको हो ।
एन्फाले पदपूर्ति समितिको सिफारिसमा एनेसलाई मुख्य प्रशिक्षक नियुक्त गरिएको एक विज्ञप्तिमार्फत जानकारी दिएको हो । 

एन्फाले मुख्य प्रशिक्षकका लागि आवेदन मागेपछि १६८ जनाले निवेदन पेश गरेका थिए। जसमध्येबाट पदपूर्ति समितिले २० जनाको नाम सर्टलिस्ट गरेको थियो ।

नवनियुक्त प्रशिक्षक एनेस यसअघि मध्य अमेरिकी मुलुक बेलिजको राष्ट्रिय फुटबल टिमको प्रशिक्षण गरेका थिए । ३८ वर्षीय एनेसले अब अब्दुल्लाह अल्मुताइरीको राजीनामा पछि रिक्त रहेको प्रशिक्षक पद सम्हाल्नेछन्।