भेडीगोठसहित ५ जनालाई बगायो बूढीगण्डकीले: उद्धारमा नेपाली सेनाको 'स्पेसल फोर्स'सहित ४३७ सुरक्षाकर्मी मैदानमा

गोरखा, २५ असोज २०८३ - उत्तरी गोरखाको चुमनुब्री गाउँपालिका–६ लोक्पा र चुम्लिङबीचमा अवस्थित सिरिङ्गी हिमालको फेदीमा पहिरो खसेर उङ्गिलुङ खोला थुनिएपछि आएको आकस्मिक बाढीमा परी पाँच जना नागरिक बेपत्ता भएका छन् । पहिरोले थुनिएको खोलाको अस्थायी बाँध अचानक फुट्दा लेदोसहितको भीषण बाढी बूढीगण्डकी नदीमा मिसिएर तटीय क्षेत्रमा ठूलो विनाश निम्त्याएको हो।

घटना लगत्तै प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बलका गरी जम्मा ४३७ जना सुरक्षाकर्मी खोज तथा तीव्र उद्धार कार्यका लागि परिचालन गरिएका छन् ।

भेडीगोठमा बस्ने पाँचै जना चिनिए

जिल्ला प्रहरी कार्यालय गोरखाका अनुसार बाढी र पहिरोले उङ्गिलुङ खोला किनारमा रहेका चार परिवारका चार वटा भेडीगोठ र करिब डेढ सय पशुचौपाया (याक तथा नाक) बगाएको छ । गोठमा बस्दै आएका चुमनुब्री गाउँपालिका–६ चुम्चेतका पाँच जना स्थानीय बासिन्दा हालसम्म सम्पर्कविहीन छन्। बेपत्ता हुनेहरूको विवरण यस प्रकार छ:
१. सोनाम लामा (६५ वर्ष)
२. मोम्मो अजी लामा (५९ वर्ष) 
३. सोम भुटी लामा (६६ वर्ष) 
४. कर्मा लामा (७३ वर्ष) 
५. पेма दोर्जे लामा (४१ वर्ष) 

हेलिकप्टरबाट ४७ जनाको जीवितै उद्धार

राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) का कार्यकारी प्रमुखका अनुसार बाढी प्रभावित दुर्गम क्षेत्रहरूबाट नेपाली सेनाका चार वटा हेलिकप्टर प्रयोग गरी हालसम्म ४७ जना नागरिकलाई सुरक्षित स्थानमा उद्धार गरिएको छ। त्यस्तै, धार्चे गाउँपालिका–३ सल्लेरीस्थित टाइम्स ऊर्जा प्रालिका १८ जना कर्मचारीहरूमध्ये १२ जनालाई सुरक्षाकर्मीको टोलीले सुरक्षित स्थानमा सारेको छ।

भौतिक पूर्वाधारमा गम्भीर क्षति: पुल र जलविद्युत गृह ध्वस्त

बाढीको तीव्र बहावले यातायात, सञ्चार र ऊर्जा क्षेत्रमा व्यापक क्षति पुर्‍याएको छ:

• चार वटा पुल ध्वस्त: आरुघाट गाउँपालिका–२ र ३ जोड्ने सोतीस्थित फलामे मोटरेबल पक्की पुल, आरुघाट–९ नयाँपुलस्थित धादिङ जोड्ने पक्की पुल, धार्चेको माछिखोला–केरौजा जोड्ने झोलुङ्गे पुल, र चुमनुब्री–३ को न्याकचेत–सिर्दिबास जोड्ने पुरानो झोलुङ्गे पुल बाढीले बगाएको छ। सडक सञ्जाल पूर्ण रूपमा अवरुद्ध भएको छ।
• घरटहरा: बाढीले १४ वटा निजी घरमा पूर्ण क्षति पुर्‍याएको छ भने ३२ वटा घरमा आंशिक क्षति पुगेको छ। माछिखोलाको तल्लो बस्तीका २० देखि २२ घर अझै जोखिममा छन् ।
• जलविद्युत र सञ्चार: बूढीगण्डकी जलविद्युत् आयोजना (३४१ मेगावाट) को मुख्य क्याम्प क्षेत्र र निर्माण उपकरण बगाएको छ । यसका साथै दोभान खोला, यारू खोला र माछा खोला जलविद्युत् आयोजनामा पनि क्षति पुगेको छ। बाढीले दुई वटा टेलिफोन टावर र ५० वटा बिजुलीका पोल ढालेपछि सञ्चार र विद्युत् सेवा अवरुद्ध छ 

उद्धार टोली र उच्च सतर्कता

खोज र उद्धारका लागि नेपाली सेनाको विशेष फौज (स्पेसल फोर्स) सहित १२७ जना, नेपाल प्रहरीका १३३ जना र सशस्त्र प्रहरी बलका १७७ जना गरी कुल ४३७ जना जनशक्ति खटिएका छन् । गृह मन्त्रालय र प्राधिकरणले गोरखा, धादिङ, तनहुँ, चितवन तथा नवलपरासीसम्मका तटीय क्षेत्रका बासिन्दाहरूलाई सुरक्षित स्थानमा रहन र नदी किनारमा नजान आपत्कालीन एसएमएस (SMS) मार्फत सार्वजनिक अपिल गरेका छन् ।