बाढी पहिरोबाट बढी क्षति भएका स्थानीय तहलाई संकटग्रस्त क्षेत्र घोषणा गर्न सिफारिस

काठमाडाैं। विपद् जोखिम न्यूनीकरण तथा व्यवस्थापन कार्यकारी समितिले बाढीपहिरोबाट क्षतिग्रस्त स्थानीय पालीकाहरुलाई संकटग्रस्त क्षेत्र घोषणा गर्न सरकारसमक्ष सिफारिस गरेको छ।

सिंहदरबारमा शुक्रबार बसेको समितिको बैठकले काभ्रे, मकवानपुर, सिन्धुली, रामेछाप लगाएतका बाढीपहिरोबाट बढी प्रभावित जिल्लाका स्थानीय तहलाई संकटग्रस्त क्षेत्र घोषणा गर्न सरकारसमक्ष सिफारिस गर्ने निर्णय गरेको हो।

बैठकमा बाढीपहिरोबाट बढि क्षतिग्रस्त भएका जिल्लालाई संकटग्रस्त क्षेत्र गर्ने बिषयमा छलफल भएपनि प्रभावित स्थानीय तहलाई नै संकटग्रस्त क्षेत्र घोषणा गर्न सरकारसमक्ष सिफारिस गर्ने निर्णय गरिएको जोखिम न्यूनीकरण तथा व्यवस्थापन प्राधिकरणका निमित्त प्रमुख बसन्त अधिकारीले जानकारी दिए।

बैठकमा पछिल्लो साता परेको भारी वर्षा र त्यसले पु¥याएको क्षतिबारे समीक्षा गर्दै राजमार्गमा देखिएका समस्या समाधानका लागि छलफल भएको थियो। हालैको बाढीपहिरोबाट २३९ जनाको मृत्यु, १६९ जना घाइते र १८ जना वेपत्ता भएको प्राधिकरणले जनाएको छ।