चीनमा फैलियो कोरोनाजस्तो नयाँ भाइरस : साना बालबालिका बढी प्रभावित, आपतकाल घोषणा गरिएको दाबी

काठमाडौं ।  कोभिड–१९ महामारी फैलिएको ५ वर्षपछि चीनमा फेरि एकपटक नयाँ भाइरसको संक्रमण फैलिएको छ । यसका लक्षणहरु पनि कोरोना भाइरस जस्तै छन् । यो नयाँ भाइरसको नाम ह्युमन मेटाप्न्युमोभाइरस (एचएमपीभी) हो, जुन आरएनए भाइरस हो।

भाइरसबाट संक्रमित हुँदा बिरामीहरूले रुघा र कोभिड-१९ जस्ता लक्षणहरू देखाउँछन्। यसको सबैभन्दा बढी असर साना बालबालिकामा परेको छ । जसमध्ये २ वर्ष मुनिका बालबालिका बढी प्रभावित छन् । चाइनाको सेन्टर फर डिजिज कन्ट्रोल एण्ड प्रिभेन्सन (सीडीसी) का अनुसार यसका लक्षणहरुमा खोकी, ज्वरो, नाक बन्द हुनु र घाँटीमा घरघराहट हुनु जस्ता छन् ।

एचएमपीभी बाहेक, इन्फ्लुएन्जा ए, माइकोप्लाज्मा निमोनिया र कोभिड-१९ को केसहरू पनि रिपोर्ट गरिएको छ। यसका बिरामीको संख्या निरन्तर बढ्दै गएको छ । सामाजिक सञ्जालमा एक पोस्टमा बिरामीको तस्बिर राखिएको छ र चीनले भाइरस फैलिएपछि धेरै ठाउँमा संकटकाल घोषणा गरेको दाबी गरिएको छ। तर, चीनले भने त्यस्तो कुनै जानकारी दिएको छैन । द स्टारको रिपोर्टका अनुसार सीडीसीले अस्थमा र क्रोनिक अब्सट्रक्टिभ पल्मोनरी जस्ता रोगबाट पीडित बिरामीहरूमा संक्रमणको जोखिम बढी हुने बताएको छ।

खोक्दा र हाछ्युँ गर्दा भाइरस सर्ने जोखिम उच्च हुन्छ । यदि भाइरसको प्रभाव गम्भीर छ भने, यसले ब्रोंकाइटिस र निमोनिया पनि निम्त्याउन सक्छ। रोयटर्सका अनुसार चीनले यसको सामना गर्न निगरानी प्रणालीको पनि परीक्षण गरिरहेको छ। एचएमपीभी भाइरस पहिलो पटक २००१ मा पहिचान गरिएको थियो । डच अनुसन्धानकर्ताले श्वासप्रश्वास रोगबाट पीडित बालबालिकाको नमूनामा यो भाइरस पत्ता लगाएका थिए । तर, यो भाइरस विगत ६ दशकदेखि वातावरणमा अस्तित्वमा रहेको छ । यो भाइरस सबै प्रकारका मौसममा र वातावरणमा पाइन्छ तर जाडोमा यसको संक्रमणको जोखिम बढी हुन्छ ।