भविष्य कोर्ने निर्णय तपाईँको हातमा

काठमाडौँ – यतिबेला देश संसदीय निर्वाचनमा होमिएको छ। आम मतादाता प्रदेश तथा प्रतिनिधिसभाका लागि जनप्रतिनिधि छान्ने तयारीमा छन्। मतदान व्यक्तिगत अधिकार हो, सम्पत्ति होइन। तर साझा विरासत हो। कहिल्यै गाउँ नफर्किएका नेता पनि गाउँगाउँमा हात जोड्दै कुदिरहेका छन्।

यो देख्दा कुनै अनौठो र आश्चर्य मान्नु पर्दैन। चुनाव नजिकिँदै गर्दा तपाईँहरूलाई लाग्न सक्छ, जस्तो सुकै मान्छे उठोस्, मतलब भएन भोट आफ्नै पार्टीको मान्छेलाई दिने हो। अर्को कुरा चिनेको, नाता पर्ने वा सम्बन्ध भएको मान्छे छ भने उसलाई दिने हो।
त्यति मात्रै होइन। कसैले नि केही गर्ने हैनन्, म त भोट नै नदिने, यत्तिकै बस्छु … यस्तै सोच बनाउँदै हुनुहुन्छ, होला। मैले तपाईँहरूको मनकै कुरा भनेँ या भनिन्। थाहा छैन। तर पक्कै पनि यो सोच तपाई हाम्रो लागि हो।

किनकि हामी धेरै वितृष्णामा पुगिसकेका छौँ। तर जबसम्म हामीमा यस्ता सोच रहिरहन्छन्, तबसम्म परिवर्तन कदापि हुँदैन। तपाई हामीलाई याद भएकै कुरा हो, यिनै कारणले हामी जस्ता युवाका कलिला सपनाहरूमाथि तुसारापात हुनेछ। तपाईँहरूकै सन्ततिमाथि ठुलो घात हुनेछ।

तपाईँ हामीले कसैको लोभ लालचमा परेर भोट हाल्यौँ भने तपाईं हाम्रो साना–साना सन्ततिको सपनाहरूको हत्या गर्दै हुनेछौँ। तपाईँको भोट बिक्री भयो भने तपाईकै कारणले तपाईँको आफ्नै छोरा छोराछोरीको भविष्य पनि बिक्री हुन सक्छ। त्यसैले भोट बिकाउ होइन, टिकाउन हुनुपर्छ।

अहिलेसम्म नेपालमा हुँदै आएको चुनावी अभियानको अभ्यास हेर्ने हो भने झुटा आश्वासन, शक्तिको दुरुपयोगका जालाहरुले घेरिएको हुन्छ भन्दा फरक नपर्ला। अब त्यो जालो तोड्नु भएन भने तपाईँकै घरको कसैले ताल्चा तोड्दा पनि तपाईँ टुलुटुलु हेर्ने भन्दा केही गर्न नसक्ने अवस्था नआउला भन्न सकिन्न।

नेपाललाई सिंगापुर बनाउने, सुखी नेपाली समृद्ध नेपाल बनाउने सपनाहरू तपाई हामीले नै सजाएका थियौ। जुन हाम्रै देशका नेताले देखाएका थिए, के ती सपना पुरा भयो त ? सपना त धेरै सजायौं। तर हाम्रो देश सिंगापुर होइन, नेपाललाई नेपाल जस्तो बनाउने नेतृत्वको खोजीमा अझै भौतारिएको छ।